آسٹریلیا اور امریکی شہریوں کے قتل پر میکسیکو کے تین ملزمین کو 158 سال قید

میکسیکو سٹی :  میکسیکو کی ایک عدالت نے 2024 میں باجا کیلیفورنیا کے ساحلی علاقے میں سرفنگ کے دوران دو آسٹریلیائی بھائیوں اور ان کے امریکی دوست کے قتل کے جرم میں تین افراد کو فی کس 158 سال اور نو ماہ قید کی سزا سنائی ہے۔

باجا کیلیفورنیا ریاست کے ساحلی شہر اینسیناڈا کی عدالت کے جج نے جمعہ کو فیصلہ سناتے ہوئے یسوع گیرارڈو گارسیا، عرف ”ایل کیکاس”، ایرینیو فرانسسکو ”این” اور اینجل یسوع ”این” کو قتل، تشدد کے ساتھ ڈکیتی اور تشدد کے ذریعے گاڑی چوری کرنے کے جرائم میں سزا سنائی۔

تینوں ملزمان کو ایک ہفتہ قبل آسٹریلیائی بھائیوں 33 سالہ کالم رابنسن اور 30 سالہ جیک رابنسن، نیز ان کے 30 سالہ امریکی دوست جیک کارٹر روڈ کے قتل کا مجرم قرار دیا گیا تھا۔

اس معاملے نے میکسیکو کی سیاحت کی صنعت کو متاثر کیا، کیونکہ اس سے ملک کا دورہ کرنے والے غیر ملکی سیاحوں کو درپیش خطرات نمایاں ہوئے۔

اس سے قبل باجا کیلیفورنیا کے ریاستی اٹارنی جنرل کے دفتر نے ہر ملزم کو 210 سال قید کی ”مثالی سزا” دینے کی درخواست کی تھی۔

باجا کیلیفورنیا سرفرز ایسوسی ایشن کے صدر انتونیو اوتانییز نے فیصلے کا خیرمقدم کرتے ہوئے کہا کہ ”انصاف ہوگیا ہے۔”

انہوں نے اعتراف کیا کہ ان ہلاکتوں کے باعث علاقے میں سیاحوں، خصوصاً سرفنگ کے شوقین افراد کی آمد میں نمایاں کمی آئی ہے۔ یہ علاقہ اپنے خوبصورت ساحلوں کے لیے مشہور ہے۔

رابنسن بھائی اور ان کے دوست اپریل 2024 کے اواخر میں میکسیکو پہنچے تھے، جہاں انہوں نے سیاحتی شہر اینسیناڈا کے قریب پونٹا سان خوسے کے ساحل پر سرفنگ کا منصوبہ بنایا تھا۔

تینوں دوستوں نے 27 اپریل 2024 کی رات ساحل پر خیمہ لگایا تھا۔ کئی روز تک ان کا کوئی سراغ نہ ملنے کے بعد حکام نے امریکی وفاقی تحقیقاتی ادارے (ایف بی آئی) کی مدد سے کئی روز تک تلاش کی مہم چلائی۔

تینوں کی لاشیں 3 مئی کو 15 میٹر سے زیادہ گہرے ایک کنویں سے برآمد ہوئیں۔ ان سب کے سروں پر گولیوں کے زخم تھے۔

گزشتہ ہفتے مقتول بھائیوں کے والد مارٹن رابنسن نے کہا تھا کہ مجرم قرار دیے جانے کا فیصلہ ان کے دونوں بیٹوں کالم اور جیک، نیز ان کے دوست کارٹر روڈ کے لیے انصاف کے حصول کی طویل اور تکلیف دہ جدوجہد میں ایک اہم مرحلہ ہے۔ انہوں نے کہا کہ ان کے پیاروں کی زندگیاں 2024 میں بے رحمی سے چھین لی گئی تھیں۔