اے پی کے تروملا میں شراب کے نشہ میں دھت تین پولیس ملازمین کی ہنگامہ آرائی، مقدمہ درج

حیدرآباد: آندھراپردیش کے تروملا میں اُس وقت سنسنی پھیل گئی جب آندھرا پردیش اسپیشل پولیس بٹالین سے تعلق رکھنے والے تین پولیس ملازمین شراب کے نشہ میں دھت ہوکر ہنگامہ کرتے پائے گئے۔

اطلاعات کے مطابق مذکورہ پولیس ملازمین الی پیری چیک پوسٹ سے گزر کر تروملا پہنچے۔نشہ کی حالت میں ان ملازمین کی گاڑی نے دوسری گھاٹ روڈ پر کرناٹک سے آنے والے شردھالووں کی گاڑی کو ٹکر دے دی۔

بعد ازاں، ان کی گاڑی تروملامیں واقع ڈی ٹائپ کوارٹرس کے قریب دیوار سے جا ٹکرائی۔ تصادم کے بعد گاڑی کے ٹائر پھٹ گئے، جس کے باعث وہیں پر ملازمین نے کچھ دیر ہنگامہ کیا۔مقامی افراد نے جب ان کی حالت دیکھی تو فوری طور پر نشہ میں ہونے کا شک ظاہر کیا اور متعلقہ حکام کو اطلاع دی۔

اطلاع ملتے ہی ویجلنس کے عہدیدار موقع پر پہنچے اور تینوں کانسٹیبلس کو حراست میں لے لیا، بعدازاں انہیں پولیس کے حوالے کر دیا گیا۔پولیس نے تینوں ملازمین کے خلاف مقدمہ درج کرتے ہوئے تحقیقات کا آغاز کر دیا۔