متحدہ عرب امارات: نئے سال کے پہلے دن عام تعطیل اور تقاریب کا اعلان

دبئی: متحدہ عرب امارات کی حکومت نے نئے سال کے موقع پر یکم جنوری کو سرکاری اور نجی ملازمین کی بامعاوضہ چھٹی دینے کا اعلان کیا ہے، ملک بھر میں تقریبات کی تیاریاں بھی جاری ہیں۔

عرب میڈیا رپورٹ کے مطابق یو اے ای کی وفاقی اتھارٹی نے 2026 کے نئے سال کے موقع پر یہ اعلان کیا ہے، دو جنوری بروز جمعہ کو ملازمین کے لئے ریموٹ ورک کا دن ہوگا جس سے بہت سے ملازمین کو سال کا آغاز قدرے آسان اور پرسُکون انداز میں کرنے کا موقع ملے گا۔

سرکاری اعلان میں بتایا گیا ہے کہ جمعرات یکم جنوری 2026 کو تمام سرکاری اور نجی اداروں میں تعطیل ہوگی، جبکہ جمعہ کو وفاقی حکومت کے ملازمین گھروں سے کام (ورک فرام ہوم) کریں گے۔ تاہم وہ ملازمین جن کی ذمہ داریاں دفتر میں حاضری کے بغیر ممکن نہیں، انہیں دفاتر آنا ہوگا۔

نئے سال کے موقع پر ملک بھر میں تقریبات کی تیاریاں جاری ہیں۔ متحدہ عرب امارات میں شاندار آتش بازی اور ڈرون شوز کا اہتمام کیا جا رہا ہے۔ راس الخیمہ میں 6 کلومیٹر طویل ساحل پر 15 منٹ کا آتش بازی کا مظاہرہ کیا جائے گا۔

دبئی میں نیو ایئر ایو کے موقع پر گلوبل ولیج، اٹلانٹس دی پام اور بلیو واٹرز آئی لینڈ پر شاندار آتش بازی، ڈرون شوز، کنسرٹس اور بیچ پارٹیز منعقد ہوں گی۔

اسی طرح ابوظبی میں شیخ زاید فیسٹیول کے دوران 62 منٹ طویل آتش بازی اور دنیا کا سب سے بڑا ڈرون شو پیش کیا جائے گا۔