عمر خالد کو قوم پرست کہنا افسوسناک:رام چندر راؤ

نئی دہلی (آئی اے این ایس) کرناٹک کانگریس کے صدر بی کے ہری پرساد کی جیل میں قید طالب علم و جہد کار عمر خالد کے بارے میں حالیہ بیان کی مذمت کرتے ہوئے تلنگانہ بی جے پی کے صدر این رام چندر راؤ نے چہارشنبہ کے روز کہا کہ ایسے شخص کو قوم پرست قرار دینا افسوسناک ہے۔

آئی اے این ایس سے بات کرتے ہوئے رام چندر راؤ نے کہا کہ کرناٹک حکومت اور کرناٹک کے قائدین کی جانب سے عمر خالد کو قوم پرست ہونے کا سرٹیفکیٹ دینا انتہائی افسوسناک ہے۔ ہم ایسے لوگوں کو قوم پرست قرار دیے جانے کی مذمت کرتے ہیں جو ہندوستان کو تقسیم کرنے کی بات کرتے ہیں، کشمیر کے لیے آزادی کی بات کرتے ہیں اور ہندوستان کے تکڑے کرنے کی بات کرتے ہیں۔

ان کے مطابق ایسے افراد ملک مخالف سرگرمیوں میں ملوث ہیں۔اکھل بھارتیہ ودیارتھی پریشد اے بی وی پی کو قوم پرست تنظیم قرار دیتے ہوئے رام چندر راؤ نے کہا کہ ایسے بیانات کی مخالفت کرنے والی واحد تنظیم آر ایس ایس سے وابستہ طلبہ تنظیم ہے۔انہوں نے مطالبہ کیا کہ کرناٹک حکومت کو نہ صرف کرناٹک کے عوام بلکہ پورے ملک کے عوام سے ایسے بیانات پر معافی مانگنی چاہیے۔

رام چندر راؤ نے مزید کہا کہ عمر خالد ملک دشمن سرگرمیوں کے حوالے سے جانے جاتے ہیں، اس لیے ایسے شخص کو قوم پرست قرار دینا انتہائی افسوسناک ہے۔

اطلاعات کے مطابق اے بی وی پی نے بنگلورو کی نیشنل لا اسکول آف انڈیا یونیورسٹی این ایل ایس آئی یو میں طلبہ کارکن عمر خالد پر بنائی گئی ایک دستاویزی فلم کی نمائش کی تجویز کی مخالفت کی تھی۔اے بی وی پی نے اس سے قبل فلم ساز للت واچانی کی عمر خالد پر بنائی گئی دستاویزی فلم کی مجوزہ نمائش منسوخ کرنے کا مطالبہ کیا تھا۔