وی سی سجنار نئے پولیس کمشنر حیدرآباد مقرر

حیدرآباد: تلنگانہ حکومت نے سینئر آئی پی ایس آفیسر وی سی سجنار کو حیدرآباد کے نئے پولیس کمشنر کے طور پر مقرر کیا۔

سی وی آنند، جو پولیس کمشنر کے طور پر خدمات انجام دے رہے تھے، کا تبادلہ کرکے حکومت کے محکمہ داخلہ میں اسپیشل چیف سکریٹری کے عہدہ پر تعینات کیا گیا۔

وی سی سجنار 1996 بیچ کے آئی پی ایس آفیسر ہیں جو متحدہ آندھراپردیش کیڈر سے تعلق رکھتے تھے۔ متحدہ ریاست اے پی کی تقسیم کے بعد انہیں تلنگانہ کیڈر الاٹ کیا گیا۔

انہوں نے اپنے کیریئر کا آغاز ورنگل ضلع کے جنگاؤں میں اسسٹنٹ سپرنٹنڈنٹ آف پولیس (اے ایس پی) کے طور پر کیا۔ اس کے بعد کڑپہ ضلع کے پُلی ویندلہ میں خدمات انجام دیں۔ ترقی کے بعد وہ پانچ اہم اضلاع نلگنڈہ، کڑپہ، گنٹور، ورنگل اور میدک میں سپرنٹنڈنٹ آف پولیس (ایس پی) رہے۔

سجنار نے ایس پی، کرائم انویسٹی گیشن ڈپارٹمنٹ (اکنامک آفنس ونگ)، ایس پی اوکٹوپس (آرگنائزیشن فار کاؤنٹرنگ ٹیررسٹ آپریشنز) اور کمانڈنٹ 6 ویں بٹالین اے پی ایس پی، منگل گری کے طور پر بھی خدمات انجام دیں۔

ڈپٹی انسپکٹر جنرل (ڈی آئی جی) اور انسپکٹر جنرل (آئی جی) کے عہدوں پر ترقی پانے کے بعد انہوں نے مارچ 2018 تک انٹلیجنس ڈپارٹمنٹ میں خدمات انجام دیں۔

مارچ 2018 سے اگست 2021 تک وہ کمشنر پولیس، سائبرآباد رہے۔ ستمبر 2021 میں انہوں نے ٹی ایس آر ٹی سی کے منیجنگ ڈائریکٹر کے طور پر چارج سنبھالا۔