وائرل ویڈیو معاملہ، کانگریس لیڈر ورشا کا بی جے پی لیڈر سومیا کیخلاف کارروائی کا مطالبہ

ممبئی: کانگریس پارٹی کی ایم ایل اے اور ممبئی ریجنل کانگریس کمیٹی کی صدر ورشا گائیکواڈ نے سوشل میڈیا پر وائرل ہونے والی ایک ویڈیو کو لے کر بھارتیہ جنتا پارٹی (بی جے پی) کے لیڈر کریٹ سومیا کے خلاف کارروائی کا مطالبہ کیا ہے۔

قابل ذکر ہے کہ سومیا مراٹھی نیوز چینل کے ذریعہ نشر ہونے والی ویڈیو میں قابل اعتراض حالت میں نظر آرہے ہیں۔ مبینہ ویڈیو پر انہوں نے ٹویٹر پر سومیا کے خلاف کارروائی کا مطالبہ کرتے ہوئے پوچھا کہ کیا بی جے پی ان کے خلاف کارروائی کرے گی۔

انہوں نے کہا، "مراٹھی نیوز چینل نے کریٹ سومیا کو بے نقاب کیا۔ ایماندار حکومت میں مشعل بردار اب بے نقاب ہو چکے ہیں جن کی اپنی اخلاقیات پر سوالیہ نشان لگ چکا ہے، وہ دوسروں کو اخلاقیات کا درس دے رہے ہیں۔ ایک طرف ان کی پارٹی ‘بیٹی بچاؤ، بیٹی پڑھاؤ’ کا نعرہ دیتی ہے تو دوسری طرف اس کے لیڈر دوسروں کے احترام کو پامال کرتے نظر آتے ہیں۔

اپنے ٹویٹ میں انہوں نے کہا کہ ’’ایک بار پھر ثابت ہوگیا کہ ان کا ‘بیٹی بچاؤ، بیٹی پڑھاؤ’ کا نعرہ دراصل بی جے پی لیڈروں کا بیٹی بچاؤ ہے۔ دوسری طرف، مسٹر سومیا نے ٹویٹ کیا، "مجھے ایک نیوز چینل نے ایک ویڈیو میں دکھایا ہے، جس میں یہ دعوی کیا گیا ہے کہ میں نے بہت سی خواتین کے ساتھ بدتمیزی کی ہے۔

مجھے ایسی بہت سی ویڈیوز اور شکایات موصول ہوئی ہیں۔ میں نے کبھی عورتوں کے ساتھ بدتمیزی نہیں کی۔ میں دیویندر فڑنویس سے گزارش کرتا ہوں کہ وہ ایسے الزامات کی تحقیقات کرائیں اور ویڈیو کی سچائی کا پتہ لگائیں۔