حیدرآباد میں دسمبر سے پانی کا بحران، سنگور اور منجیرہ کے ذخائر صرف 42 دن کے لیے کافی
ذخائر میں پانی کی کم ہوتی سطح کے باعث شہر کے کئی علاقوں میں پانی کی سربراہی متاثر ہونے کا اندیشہ ہے۔ خاص طور پر حلقہ اسمبلی سیری لنگم پلی، پٹن چیرو، جوبلی ہلز، کوکٹ پلی، صنعت نگر، راجندر نگر اور خیریت آباد میں پانی کی فراہمی میں مشکلات پیش آ سکتی ہیں۔
حیدرآباد: شہر حیدرآباد میں دسمبر سے پینے کے پانی کے شدید بحران کا خدشہ ظاہر کیا جا رہا ہے۔ حکام کے مطابق سنگور اور منجیرہ آبی ذخائر میں موجود پانی شہر کی ضروریات کے لیے صرف مزید 42 دن تک کافی ہوگا۔
ذخائر میں پانی کی کم ہوتی سطح کے باعث شہر کے کئی علاقوں میں پانی کی سربراہی متاثر ہونے کا اندیشہ ہے۔ خاص طور پر حلقہ اسمبلی سیری لنگم پلی، پٹن چیرو، جوبلی ہلز، کوکٹ پلی، صنعت نگر، راجندر نگر اور خیریت آباد میں پانی کی فراہمی میں مشکلات پیش آ سکتی ہیں۔
حکام کے مطابق سیری لنگم پلی اسمبلی حلقہ پانی کی قلت سے سب سے زیادہ متاثر ہونے والے علاقوں میں شامل ہو سکتا ہے۔
صورتحال کی سنگینی کو دیکھتے ہوئے عہدیدار سنگور اور منجیرہ سے پانی حاصل کرنے والے علاقوں میں گوداوری کا پانی منتقل کرنے کے متبادل منصوبے تیار کر رہے ہیں، تاکہ شہر میں پینے کے پانی کی سربراہی متاثر نہ ہو۔
دوسری جانب ماہرین نے حکام کی آبی انتظامیہ پر تنقید کرتے ہوئے کہا ہے کہ اگر چھ ماہ قبل گوداوری کا پانی زیریں علاقوں کی جانب نہ چھوڑا گیا ہوتا تو آج یہ صورتحال پیدا نہ ہوتی۔
ذخائر میں پانی کی مسلسل کمی نے شہر کی آبی ضروریات کے حوالے سے تشویش بڑھا دی ہے۔ اب حکام کے سامنے سب سے بڑا چیلنج آنے والے مہینوں میں شہریوں کو بلا تعطل پینے کا پانی فراہم کرنا ہے۔
