تلنگانہ اور آندھراپردیش کے مشترکہ سری سیلم پراجکٹ سے پانی چھوڑاگیا

حیدرآباد: تلنگانہ اورآندھراپردیش کے مشترکہ سری سیلم پراجکٹ سے پانی چھوڑاگیا۔اس ڈیم کے بالائی علاقوں سے پانی کا شدید بہاو جاری ہے جس کے سبب حکام نے اس کے دروازے کھولتے ہوئے پانی کوچھوڑا۔

پراجکٹ میں پانی کے شدید بہاؤ بڑھنے کے باعث اس سال پانچویں بار تین دروازوں کو 10 فٹ تک اونچا کرتے ہوئے پانی کو چھوڑاگیا۔

اس وقت پراجکٹ میں 2,26,192 کیو سک پانی کا بہاو درج کیاگیا جس کے بعد اس کے دروازے کھولتے ہوئے 1,49,104 کیوسیک پانی کوچھوڑاگیا۔پراجکٹ کی مکمل سطح آب 885 فٹ ہے جبکہ موجودہ سطح 883.90 فٹ تک پہنچ چکی ہے۔

دائیں اور بائیں پاور ہاؤسس میں بجلی کی پیداوار جاری ہے۔حکام کے مطابق بالائی سے پانی کے اس پراجکٹ میں بہاو میں اضافہ ہو رہا ہے اور صورتحال کا مسلسل جائزہ لیا جا رہا ہے تاکہ ضروری اقدامات کئے جا سکیں۔

اسی دوران محکمہ موسمیات نے اطلاع دی ہے کہ اتوارکو آندھرا پردیش میں شدید بارش متوقع ہے۔ عوام سے اپیل کی گئی ہے کہ وہ محتاط رہیں اور حفاظتی ہدایات پر عمل کریں۔