جوبلی ہلز ضمنی انتخاب میں بی آر ایس کی ناکامی کا ذمہ دار کون؟ کارکنوں نے کھولی پارٹی میٹنگ میں سب کی پول

حیدرآباد: جوبلی ہلز ضمنی انتخاب میں بی آر ایس کو بڑا دھچکا لگا، جو پارٹی رکن اسمبلی مگنتی گوپی ناتھ کے انتقال کے بعد منعقد ہوا تھا۔ سیٹ کو برقرار رکھنے کے لیے بی آر ایس نے ان کی اہلیہ سنیتا گوپی ناتھ کو امیدوار کے طور پر میدان میں اتارا، لیکن ہمدردی کی لہر بھی پارٹی کو جیت دلانے میں کامیاب نہ ہوسکی اور عوام نے کانگریس کے حق میں فیصلہ سنایا۔

شکست کے بعد جوبلی ہلز حلقے کے بی آر ایس قائدین اور کارکنوں نے ایک جائزہ میٹنگ منعقد کی جس میں ناکامی کی وجوہات پر تفصیلی گفتگو ہوئی۔ سابق وزراء کے ٹی راما راؤ اور ہریش راؤ بھی اجلاس میں شریک ہوئے اور کارکنوں سے براہِ راست اُن کے تاثرات سنے۔

اجلاس کے دوران متعدد کارکنوں نے اپنی ہی پارٹی قیادت پر شدید تنقید کی۔ کچھ کارکنوں نے الزام لگایا کہ چند مقامی قائدین انتخابی مہم کے دوران بزدلانہ رویہ اختیار کیے ہوئے تھے، جس کا فائدہ مخالف جماعت کو ملا۔ کچھ نے نشاندہی کی کہ مقامی قائدین اور اضلاع سے آنے والے بی آر ایس لیڈروں کے درمیان تال میل کا فقدان رہا، جس کا نتیجہ منفی طور پر سامنے آیا۔

کارکنوں نے یہ بھی بتایا کہ جوبلی ہلز کے مقامی بی آر ایس قائدین نے ضمنی انتخاب کو مطلوبہ سنجیدگی سے نہیں لیا اور حلقے میں دوسرے درجے کی قیادت کی شدید کمی محسوس کی گئی۔ ساتھ ہی یہ بھی کہا کہ بی آر ایس کانگریس کی انتخابی حکمتِ عملی اور پول مینجمنٹ کا مقابلہ کرنے میں ناکام رہا، جس کی وجہ سے پارٹی کو شکست کا سامنا کرنا پڑا۔