راجستھان میں راجہ سنگھ کی اشتعال انگیز تقریر، مقدمہ درج

کوٹا: راجستھان میں کوٹاکے کنہڑی پولیس اسٹیشن نے ریاست تلنگانہ کے گوشا محل اسمبلی حلقہ سے ایم ایل اے ٹی راجا کے خلاف اشتعال انگیز تقریر کا مقدمہ درج کیا ہے۔

ایم ایل اے ٹی راجا کے خلاف اشتعال انگیز تقریر دینے کے معاملے میں یہ مقدمہ پولیس نے خود درج کیا ہے اور کنہڑی کے اسٹیشن انچارج گنگا سہائے شرما نے ان کی جانب سے کنہڑی تھانے میں یہ مقدمہ درج کروایا ہے۔ چونکہ یہ معاملہ ایم ایل اے کے خلاف ہے اس لیے کیس کی جانچ سی بی سی آئی ڈی کو سونپی جارہی ہے۔

موصولہ اطلاع کے مطابق ریاست تلنگانہ کے گوشہ محل حلقہ سے ایم ایل اے ٹی راجامہارانا پرتاپ جینتی پر منعقد ہونے والی تقریبات کے سلسلے میں دعوت پر کوٹا آئے تھے۔

 انہوں نے پیر کو مہارانا پرتاپ جینتی کے موقع پر کوٹاکے کنہڑی تھانہ علاقے میں منعقدہ ایک میٹنگ میں ایک خاص برادری کے خلاف تقریر کی اور اس کی بنیاد پر پولیس نے فرقہ وارانہ ہم آہنگی بگاڑنے کی کوشش کرنے کے تحت مقدمہ درج کیا ہے جس میں کہا گیا ہے کہ ٹی راجا کی طرف سے دئے گئے تقریری کے الفاظ امن اور ہم آہنگی کو خراب کرنے والے ہیںاس لئے اس معاملے میں مقدمہ درج کیا گیا ہے۔

قابل ذکر ہے کہ ریاست تلنگانہ کے حیدرآباد کے گوشہ محل علاقے سے ایم ایل اے اپنے بیانات کی وجہ سے مسلسل سرخیوں میں ہیں۔ حال ہی میں، رام نومی کے جلوس کے دوران انہوں نے حیدرآباد کے علاقے میں منعقدہ ہزاروں لوگوں کے اجلاس میں ہندوستان کو ہندو قوم قرار دینے کا عہد دلایا تھا۔