سکندرآباد میں پانچویں جماعت کی لڑکی نے خودکشی کرلی !!

حیدرآباد: سکندرآباد کی ٹکارہ بستی میں جمعرات کو ایک نو سالہ لڑکی اپنے گھر میں لٹکی ہوئی پائی گئی۔ پولیس، جس نے خودکشی کا شبہ ظاہر کیا ہے، کہا کہ وجہ ابھی معلوم نہیں ہو سکی ہے۔

لڑکی ایم سمیکشا، سکندرآباد کے ایک پرائیویٹ اسکول کی پانچویں جماعت کی طالبہ تھی۔ وہ اپنی ماں، جو گھریلو ملازمہ کے طور پر کام کرتی تھی، اور دو بہن بھائیوں کے ساتھ رہتی تھی۔

سمیکشا گزشتہ 15 دن سے اسکول نہیں جا رہی تھی اور جب اس کی والدہ نے اس سے سوال کیا تو اس نے کہا کہ اسے اسکول جانے کا من نہیں کرتا اور اسکول جانے کی اسے کوئی وجہ بھی نظر نہیں آتی۔ پولیس کے مطابق لڑکی کی والدہ نے اسے اسکول جانے کے لئے زبردستی نہیں کی بلکہ اسے گھر پر رہنے اور اپنے تین سالہ بھائی کی دیکھ بھال کرنے کی ہدایت دی کیونکہ وہ روزانہ کام پر جایا کرتی تھی۔

جمعرات کی صبح، وہ سمیکشا اور اس کے چھوٹے بھائی کو گھر چھوڑ کر کام پر چلی گئی۔ جب وہ دوپہر کے قریب گھر واپس آئی تو سمیکشا ہال میں چھت سے لٹکی ہوئی پائی گئی۔

لڑکی کی ماں ایم گیتا کی شکایت پر مارکیٹ پولیس تحقیقات کر رہی ہے۔