ناٹو اگر تصادم چاہتا ہے تو ہم تیار ہیں:پوٹین

ماسکو: روس کے صدر ولادیمیر پوٹین نے کہا ہے کہ ہم دفاعی تنظیم (ناٹو) کے ساتھ تصادم کے خواہاں نہیں ہیں لیکن اگر وہ یہ چاہتے ہیں تو ہم اس کے لئے بھی تیار ہیں۔

گزشتہ روز میڈیا سے گفتگو کرتے ہوئے روسی صدر نے اس بات کی تصدیق کی کہ ماسکو نے یوکرینی بحران پر بات چیت کو مسترد نہیں کیا۔

بحران کے لیے افریقی اقدام ایک بنیاد ہو سکتا ہے جس پر امن قائم کیا جاسکتا ہے۔غیر ملکی خبر رساں ایجنسی کی رپورٹ کے مطابق پوٹین نے اسی تناظر میں کہا کہ روس جنگ بندی کے حوالہ سے افریقی امن اقدام کے نکتہ کو پورا نہیں کرسکتا کیونکہ یوکرین بڑے پیمانہ پر حملے کر رہا ہے۔

ولادیمیر پوٹین نے مزید کہا کہ اس وقت یوکرین کے محاذ پر کوئی غیرمعمولی تبدیلیاں نہیں ہوئی ہیں۔ 4 جون سے یوکرین اپنے 415 ٹینک اور 1300 بکتر بند گاڑیاں کھو چکا ہے۔

صدر پوٹین نے روس اور افریقی ممالک کے درمیان تعلقات پر بات کرتے ہوئے کہا کہ ہم افریقی براعظم کے بہت سے ممالک کے لیے فوجی سازو سامان کو محفوظ بنانا چاہتے ہیں۔ انہوں نے کہا کہ کئی ممالک مغربی دباؤ کے خوف کے بغیر روسی ہتھیار خریدتے ہیں۔