اقلیتوں کی بہبود کیلئے حکومت پُرعزم، کئی عہدے مسلمانوں کو دیئے گئے: جگن موہن ریڈی

حیدرآباد: آندھراپردیش کے وزیراعلی وائی ایس جگن موہن ریڈی نے واضح کیا ہے کہ ان کی حکومت اقلیتوں کی فلاح و بہبود کے لیے پرعزم ہے۔انہوں نے وجئے واڑہ میں یوم اقلیتی بہبو د اور قومی یوم تعلیم کے موقع پر اندرا گاندھی میونسپل اسٹیڈیم میں ملک کے پہلے وزیرتعلیم بھارت رتن مولانا ابوالکلام آزاد کی یوم پیدائش کی تقاریب میں شرکت کی۔

 اس موقع پر خطاب کرتے ہوئے انہوں نے کہاکہ وائی ایس آرکانگریس حکومت نے اقلیتوں کی ترقی کو ترجیح دی ہے۔ پچھلی حکومت میں تلگودیشم نے اقلیتوں کونظرانداز کیا تھا۔ انہوں نے کہا کہ نائب وزیراعلی کا عہدہ مسلمان کو دے کر ان کی حکومت اقلیتوں کا احترام کر رہی ہے۔

انہوں نے یاد دہانی کروائی کہ ان کے والد و متحدہ آندھراپردیش کے سابق وزیراعلی آنجہانی وائی ایس راج شیکھرریڈی نے مسلمانوں کیلئے پانچ فیصد ریزرویشن کو یقینی بنایاتھا۔جگن جو حکمران جماعت وائی ایس آرکانگریس کے سربراہ بھی ہیں نے زوردیتے ہوئے کہاکہ ان کی پارٹی کے چارارکان اسمبلی اقلیتی طبقہ سے تعلق رکھتے ہیں۔

 اقلیتوں کو ان کی وزارت میں مناسب مقام دیا گیا ہے۔نہ صرف یہ بلکہ ان کی پارٹی نے مسلم خاتون ذکیہ خانم کو قانون ساز کونسل کی نائب صدرنشین بننے کا موقع بھی فراہم کیا۔ انہوں نے کہاکہ تمام شعبوں میں ان کی حکومت نے 2019 سے اقلیتوں کے مفاد میں کئے کام کئے۔ یہ حکومت ہر غریب کی فلاح و بہبود کے لیے کام کر رہی ہے۔