تلنگانہ کے نارائن پیٹ ضلع میں شارٹ سرکٹ کے باعث آگ ، 13 سالہ نابینا لڑکی زندہ جل گئی

حیدرآباد: تلنگانہ کے نارائن پیٹ ضلع کے مکتھل ٹاؤن میں پیش آئے ایک افسوسناک واقعہ میں شارٹ سرکٹ کی وجہ سے گھر میں لگی آگ میں ایک 13 سالہ نابینا لڑکی زندہ جل کر ہلاک ہوگئی۔

پولیس کے مطابق، مکتھل کے نندنی نگر علاقہ میں رہنے والے مزدور جوڑے کِشٹپا اور سجاتا کے دو بیٹیاں اور ایک بیٹا ہیں۔ ان کی بڑی بیٹی بھانو پریہ (13) کی بینائی مکمل طور پر ختم ہوچکی تھی۔

جب والدین مزدوری کے لیے گئے تھے، چھوٹے بچے کھیلنے کے لیے باہر چلے گئے، تب گھر میں صرف بھانو پریہ ہی موجود تھی۔

اسی دوران شارٹ سرکٹ کے سبب گھر میں اچانک آگ بھڑک اٹھی جس نے دیکھتے ہی دیکھتے سارا گھر اپنی لپیٹ میں لے لیا۔ آگ اتنی شدید تھی کہ گھر کا سارا سامان جل گیا اور بھانو پریہ بھی زندہ جل گئی۔

گھر سے اٹھتے گھنے دھویں کو دیکھ کر مقامی افراد نے فوراً فائر بریگیڈ اور پولیس کو اطلاع دی۔ فائر عملہ موقع پر پہنچ کر آگ پر قابو پانے میں کامیاب ہوا لیکن تب تک لڑکی مکمل طور پر جھلس چکی تھی۔

پولیس اور فائر عملہ نے ابتدائی جانچ میں آگ لگنے کی وجہ شارٹ سرکٹ کو قرار دیا ہے۔