حیدرآباد میں گنیش مورتی کے استقبال کی تقریب کے دوران 19 سالہ بی ٹیک طالب علم کی موت

حیدرآباد: شہر کے رام نگر چوراستہ پر گنیش مورتی کے استقبال کی تقریب کے دوران ایک افسوسناک واقعہ پیش آیا، جہاں رقص کرتے ہوئے ایک 19 سالہ بی ٹیک طالب علم اچانک گر پڑا اور بعد ازاں اس کی موت ہوگئی۔

متوفی کی شناخت بدری ناتھ کے طور پر کی گئی ہے، جو کڑپہ ضلع کا رہنے والا تھا اور مشیرآباد میں مقیم تھا۔ وہ عابڈس کے میتھوڈسٹ کالج میں بی ٹیک کی تعلیم حاصل کر رہا تھا۔

اطلاعات کے مطابق بدری ناتھ رام نگر چوراستہ پر گنیش مورتی کے استقبال کی تقریبات میں شرکت کر رہا تھا۔ جشن کے دوران رقص کرتے ہوئے وہ اچانک بے ہوش ہوکر زمین پر گر پڑا۔

واقعے کی اطلاع ملتے ہی پولیس نے فوری طور پر اسے گاندھی اسپتال منتقل کیا، تاہم ڈاکٹروں نے معائنہ کے بعد اسے مردہ قرار دے دیا۔

نوجوان طالب علم کی اچانک موت سے تقریب میں موجود افراد، دوستوں اور ساتھی طلبہ میں غم کی لہر دوڑ گئی۔

پولیس نے واقعے کی تحقیقات شروع کردی ہیں، جبکہ بدری ناتھ کی اچانک موت کی حتمی وجہ تاحال معلوم نہیں ہوسکی ہے۔