اسرائیلی فضائی حملوں میں 2 ہلاک، 76 زخمی لبنان کی وزارت صحت کا بیان

بیروت: لبنان کی وزارت صحت نے آج کہا کہ بیروت کے مضافاتی علاقہ میں اسرائیل کے متعدد فضائی حملوں کے نتیجہ میں کم ازکم 2 افراد ہلاک اور دیگر 76 زخمی ہوگئے۔

اسرائیلی فوج نے آج بیروت میں حزب اللہ کے مرکزی ہیڈکوارٹرس کو نشانہ بنایا۔ سلسلہ وار دھماکوں میں کئی عمارتیں زمیں بوس ہوگئیں اور سیاہ دھویں کے بادل اُٹھنے لگے۔

لبنانی دارالحکومت میں گزشتہ ایک سال کے دوران کئے گئے یہ سب سے بڑے دھماکے تھے۔ اسرائیل کے تین بڑے ٹی وی چینلوں نے کہا کہ بیروت کے جنوبی مضافاتی علاقوں میں کئے گئے حملوں میں حزب اللہ کے لیڈر حسن نصراللہ کو نشانہ بنایا گیا۔ ان اطلاعات کی فوری طور پر تصدیق نہیں ہوسکی اور فوج نے تبصرہ کرنے سے انکار کردیا۔

بتایا جاتا ہے کہ حملوں کے وقت حسن نصراللہ ہیڈکوارٹرس میں موجود تھے لیکن وہ محفوظ رہے۔ حزب اللہ کے ذرائع کا کہنا ہے کہ حسن نصراللہ محفوظ مقام پر خیریت سے ہیں۔