ریاض کی ایک کمپنی میں 5 کے بجائے 4 دن کام (ویڈیو)

ریاض: سعودی دارالحکومت ریاض میں ملازمین کو بڑی سہولت دیتے ہوئے نجی کمپنی نے ہفتہ وار کام کے لئے 5 کے بجائے 4 دن مقرر کردیئے۔

سعودی خبر رساں ادارہ کی رپورٹ کے مطابق یہ سعودی عرب میں پہلی کمپنی شمار کی جارہی ہے جس نے اپنے ملازمین کی خاطر دو کے بجائے تین دن کی ہفتہ وار تعطیل پرعمل آمد شروع کیا ہے۔

رپورٹس کے مطابق کام کا ہفتہ وار دورانیہ کم کرنے جبکہ تنخواہ میں کسی قسم کی کٹوتی نہ کرنے سے جہاں ملازمین بھی خوش ہیں جبکہ کام کے معیار میں بھی بہتری آگئی ہے۔

ایک خاتون ملازم نے میڈیا سے بات کرتے ہوئے کہا کہ یہ بہت اچھا فیصلہ ہے جس پرعمل درآمد کیا گیا ہے۔ اس فیصلے سے کارکنوں کو سہولت مل گئی ہے۔

اب ہمیں آرام کا بھی کافی وقت مل جاتا ہے۔خاتون کارکن کا مزید کہنا تھا کہ ہم اپنے اہل خانہ اور دوستوں میں بھی وقت گزار سکتے ہیں جبکہ جم کے لئے بھی وقت نکال سکتے ہیں۔

کمپنی کے سیلز ڈپارٹمنٹ سے منسلک ذمہ دار نے بتایا کہ کمپنی کی جانب سے کیا گیا یہ فیصلہ بہترین ہے، اس سے کارکنوں میں کام کرنے کی صلاحیت اور کمپنی کی پروڈکشن میں بھی اضافہ ہوگیا ہے۔

کمپنی کے ایک ملازم نے مزید کہا کہ میں جدہ میں رہائش پذیر ہوں جبکہ کمپنی ریاض میں ہے۔ اس فیصلہ سے ہم سب کو تین دن کا وقت مل جاتا ہے ویک اینڈ پر میں اپنے شہر آرام سے جاسکتا ہوں۔