تلنگانہ میں سرسبزی وشادابی میں 7.7 فیصد کا اضافہ:ہریش راو

حیدرآباد: تلنگانہ کے وزیر صحت ہریش راؤ نے کہا ہے کہ ریاست ہر طرح کے بنیادی ڈھانچہ کے ساتھ ترقی کر رہی ہے۔

انہوں نے کہا کہ تلنگانہ دنیا کے ان نایاب مقامات میں سے ایک ہے جو تمام سہولیات کے ساتھ ترقی کر رہا ہے۔

انہوں نے کہا کہ ریاست میں سرسبزی وشادابی میں 7.7 فیصد کا اضافہ ہوا ہے اور یہ صرف وزیر اعلی چندرشیکھرراو کی جانب سے دور اندیشی کے ساتھ متعارف کروائے گئے سرسبزی وشادابی کے پروگرام ہریتاہارم سے ممکن ہوا ہے۔

انہوں نے کہا کہ تلنگانہ نے فخر کے ساتھ دنیا کو دکھایا ہے کہ ہر حکومت کو کیا کرنا چاہئے۔

سوشیل میڈیا کے اہم پلیٹ فارم ٹوئیٹر پر سرگرم تارک راما راو نے ٹویٹ کرتے ہوئے کہاکہ تلنگانہ جو کرے گا اس پر ملک عمل کرے گا۔

انہوں نے کہاکہ ہریتا ہارم پروگرام کے حصہ کے طورپر ریاست میں 14,864 نرسریز اور 19,472 پلے پرکرتی جنگلات قائم کیے گئے ہیں۔

جملہ 13.44 لاکھ ایکڑاراضیات پر پھیلے جنگلات کو بحال کیا گیا ہے اور اب تک 273 کروڑ پودے لگائے جا چکے ہیں۔