مکان سے 80 تولے طلائی زیورات اور 14 لاکھ کی چوری

حیدرآباد: آندھراپردیش کے ضلع نندیال کے ایک مکان میں گھس کر چوروں نے 80تولے کے طلائی زیورات اور14لاکھ روپئے نقد رقم کی چوری کرلی۔ذرائع کے مطابق یہ واردات کل شب ضلع کے رام پورم میں واقع ناپارلا انڈسٹریز ایسوسی ایشن کے صدر ایم وینکٹیشور ریڈی کے مکان میں پیش آئی۔

وینکٹیشور ریڈی اپنے ارکان خاندان کے ساتھ تروملا گئے تھے۔چوروں نے گھر میں کسی کے بھی نہ ہونے کا فائدہ اٹھاتے ہوئے قفل شکنی کے ذریعہ یہ واردات انجام دی۔

اس واقعہ کی اطلاع مقامی افراد نے پولیس اور وینکٹیشورریڈی کو دی جس کے بعد پولیس نے وہاں پہنچ کر صورتحال کا جائزہ لیا۔پولیس نے مکان سے شواہد جمع کئے اور اس خصوص میں ایک معاملہ درج کرکے چوروں کی تلاش شروع کردی۔