کاروان میں انسدادِ منشیات اور چینی مانجا کے خلاف شاندار ریلی، ریاستی وزیر محمد اظہرالدین کی شرکت

حیدرآباد: کاروان میں انسدادِ منشیات کے خلاف ایک شاندار آگاہی ریلی اور جلسۂ عام کا انعقاد رائل سی ہوٹل، جھِرّا سے محبوب کالونی تک کامیابی کے ساتھ کیا گیا۔ اس پروگرام کا مقصد نوجوانوں، طلبہ، اور عوام میں منشیات کے مضر اثرات کے بارے میں شعور اجاگر کرنا اور چائنا مانجا کے خطرات سے آگاہی فراہم کرنا تھا۔

پروگرام میں وزیر اقلیتی بہبود حکومتِ تلنگانہ جناب محمد اظہرالدین، ڈائریکٹر انسدادِ منشیات حکومتِ تلنگانہ جناب سندیپ شاندلیہ IPS، ڈی سی پی گولکنڈہ زون جناب جی چندر موہن اور چیئرمین فشریز کوآپریٹو سوسائٹی فیڈریشن جناب مِتّو سائی کمار نے شرکت کی اور خطاب کیا۔

وزیر اقلیتی بہبود جناب محمد اظہرالدین نے اپنے خطاب میں کہا کہ "ہمیں نوجوانوں کو منشیات سے بچانے کے لیے مل کر کام کرنا ہوگا۔ اس کے لیے حکومتِ تلنگانہ نے EIGLE Force تشکیل دی ہے اور ہم منشیات مافیا کے مکمل خاتمے تک چین سے نہیں بیٹھیں گے۔”

ڈائریکٹر انسدادِ منشیات جناب سندیپ شاندلیہ نے نوجوانوں کو منشیات سے دور رہنے کی ہدایت دیتے ہوئے ان کے جسمانی، ذہنی اور سماجی نقصانات پر روشنی ڈالی۔ انہوں نے والدین اور طلبہ سے اپیل کی کہ وہ منشیات کے خلاف آگاہی پیدا کریں اور ایک محفوظ مستقبل کی تعمیر کریں۔

ڈی سی پی گولکنڈہ زون جناب جی چندر موہن نے چائنا مانجا کے استعمال کے بڑھتے ہوئے خطرات پر تشویش کا اظہار کیا اور اس کے فروخت کنندگان کو قانون کے مطابق سخت کارروائی کی دھمکی دی۔

کانگریس پارٹی کے حلقہ اسمبلی کاروان کے انچارج جناب عثمان بن محمد الہاجری نے کہا کہ "منشیات اور چائنا مانجا ہمارے نوجوانوں کے مستقبل کے لیے سنگین خطرہ ہیں۔ کانگریس پارٹی عوام کے ساتھ مل کر اس مہم کو جاری رکھے گی اور کسی بھی صورت میں نوجوانوں کے مستقبل سے کھیلنے کی اجازت نہیں دے گی۔”

پروگرام کے اختتام پر عوام سے اپیل کی گئی کہ وہ منشیات اور چائنا مانجا کے خلاف اس مہم میں حکومت اور انتظامیہ کا بھرپور ساتھ دیں اور کسی بھی معلومات کی صورت میں فوری طور پر پولیس کو آگاہ کریں تاکہ ایک صحت مند، محفوظ اور منشیات سے پاک معاشرہ تشکیل دیا جا سکے۔

پروگرام کے اختتام پر جناب عثمان بن محمد الہاجری نے اسکول اور کالج کے تمام کرسپانڈنٹس، اساتذہ، اور ذمہ داران کا شکریہ ادا کیا۔

پروگرام میں شریک اہم رہنماؤں میں جناب مٹو سائی کمار، یوتھ لیڈر مقبول بن عبداللہ الہاجری، ارون کمار درگا پرساد، اور نائب صدر یوتھ کانگریس خیریت آباد ڈسٹرکٹ عبداللہ بن عثمان الہاجری شامل تھے۔