ہندوستانی ٹیم کو پاکستان لانے نئی تجویز پیش

لاہور: آئی سی سی چمپئنس ٹرافی آئندہ سال پاکستان میں مقرر ہے اس میں ہندوستان کی شرکت یقینی بنانے کیلئے نیا فارمولا سامنے آیا ہے۔ آئی سی سی چمپئنس ٹرافی آئندہ سال فروری، مارچ میں ہونے والی ہے اور انٹرنیشنل کرکٹ کونسل کے چیف ایگزیکٹو نے اس کی توثیق بھی کردی ہے۔

اس ٹورنامنٹ میں 8 ٹیموں کو شرکت کرنی ہے۔ ہندوستان کے سوا تمام ٹیمیں چمپئنس ٹرافی کیلئے پاکستان آنے کی یقین دہانی کراچکی ہیں لیکن ہندوستان کی جانب سے اس حوالہ سے اب تک کوئی واضح جواب نہیں دیا گیاہے جس سے خود اس ایونٹ کے مستقبل پر بھی سوالیہ نشان لگ رہا ہے۔

یہ ٹورنامنٹ پاکستان کے 3 شہروں کراچی، لاہور اور پنڈی میں کھیلا جانا ہے اور پی سی بی کے جاری عبوری شیڈول میں ہندوستان کے تمام میاچس لاہور میں رکھے گئے ہیں۔ اسی تناظر میں بعض سابق کرکٹرز کی جانب سے ہندوستان کی پاکستان میں چمپئنز ٹرافی میں شرکت یقینی بنانے کیلئے ایک نیا آپشن سامنے آیا ہے جس میں ٹیم انڈیا پاکستان میں قیام کئے بغیر اپنے میاچس لاہور میں کھیل سکتی ہے۔

لاہور اور امرتسر الگ الگ ملکوں کے پڑوسی شہر ہیں جنہیں واگہہ بارڈر آپس میں ملاتا ہے اور دونوں ممالک کے مختلف وفود سمیت عام شہری بھی اسی راستے سے ایک دوسرے ملک آتے جاتے ہیں۔ تجویز سامنے یہ آئی ہے کہ ہندوستانی ٹیم اپنے تمام میاچس لاہور میں ہی کھیلے لیکن پاکستان میں قیام نہ کرے بلکہ اپنے میچ کھیل کر واپسی ہندوستانی شہر امرتسر میں آئے اور یہاں قیام کرے۔

واضح رہے کہ واہگہ بارڈر سے ٹیم انڈیا لگ بھگ آدھے گھنٹے میں قذافی اسٹیڈیم پہنچ سکتی ہے، تاہم اس تجویز میں ہندوستانی ٹیم کی پریکٹس کے حوالہ سے کوئی تجویز نہیں ہے۔ دوسری جانب اگر یہ تجویز باضابطہ طورپر سامنے لائی جاتی ہے تب بھی اس کا انحصار دونوں ممالک کے بورڈز کے ساتھ ساتھ دونوں ممالک کی حکومتوں کی رضا مندی پر ہوگا۔

واضح رہے کہ اس سے قبل ہندوستانی ٹیم گزشتہ سال پاکستان میں ہونے والے ایشیا کپ کیلئے بھی پاکستان نہیں گئی تھی جس کے بعد یہ ٹورنامنٹ ہائبرڈ ماڈل کے تحت کھیلا گیاتھا۔ یاد رہے کہ ہندوستانی کرکٹ بورڈ کے موجودہ سکریٹری جے شاہ رواں برس دسمبر میں انٹرنیشنل کرکٹ کونسل (آئی سی سی) کے صدر بن جائیں گے جس کے بعد ہی اس سلسلہ میں کوئی حتمی فیصلہ ہونے کا امکان ہے۔