ناگپور میں تیز رفتار ایس یو وی کی ٹکر سے صبح کی سیر پر نکلے بزرگ شہری کی موت

ناگپور: اتوار کی صبح ناگپور میں جاپانی گارڈن کے قریب مبینہ طور پر 2 دیگر کاروں کے ساتھ ریس لگا رہی تیز رفتار ایس یو وی کی زد میں آنے سے صبح کی سیر پر نکلے ایک بزرگ شہری کی موت ہوگئی۔ پولیس نے یہ اطلاع دی۔

مہلوک کی شناخت ناگپور کے آواستی چوک کے رہنے والے کیلاش سنودیا کے طور پر ہوئی ہے، جو حادثے کے وقت صبح کی سیر کے لیے نکلے تھے۔

ابتدائی اطلاعات کے مطابق جاپانی گارڈن روڈ پر 3 کاریں تیز رفتاری سے جا رہی تھیں اور شبہ ہے کہ وہ آپس میں ریس لگا رہی تھیں۔

حادثے کے دوران ٹیکسی نمبر والی انووا کے ڈرائیور نے مبینہ طور پر گاڑی پر قابو کھو دیا، جس کے بعد گاڑی سنودیا سے ٹکرا گئی اور پھر گارڈن کی چہاردیواری سے جا ٹکرائی۔سنودیا کو شدید چوٹیں آئیں اور موقع پر ہی ان کی موت ہوگئی۔ ٹکر کے اثر سے گاڑی کا اگلا حصہ بری طرح تباہ ہوگیا۔

پولیس نے بتایا کہ حادثے کے بعد دیگر 2 کاروں کے ڈرائیور موقع سے فرار ہوگئے۔مقامی باشندوں نے پولیس کو اطلاع دی، جس کے بعد پولیس کی ایک ٹیم موقع پر پہنچ گئی۔

تباہ شدہ گاڑی میں ایک شخص پھنسا ہوا ملا، جبکہ انووا میں سوار 2 افراد کو پوچھ گچھ کے لیے حراست میں لے لیا گیا۔پولیس کو شبہ ہے کہ گاڑی میں سوار نوجوان شراب کے نشے میں ہو سکتے ہیں اور ان کا طبی معائنہ کرایا جا رہا ہے۔

مقدمہ درج کیا جا رہا ہے اور مزید تفتیش جاری ہے۔ پولیس علاقے کی سی سی ٹی وی فوٹیج کا جائزہ لے رہی ہے تاکہ دیگر گاڑیوں اور ان کے ڈرائیوروں کی شناخت کرکے انہیں تلاش کیا جا سکے۔