پاکستان کے خلاف میچ میں ابھیشیک شرما کی واپسی کے امکانات: ورون
پیٹ میں انفیکشن کی وجہ سے ابھیشیک نامیبیا کے خلاف میچ میں حصہ نہیں لے سکے تھے۔ اس سے پہلے دہلی پہنچنے پر جانچ کے لیے انہیں اسپتال میں داخل بھی ہونا پڑا تھا، تاہم بعد میں انہیں چھٹی دے دی گئی اور وہ نامیبیا کے خلاف میچ سے قبل میدان میں بھی موجود تھے۔
نئی دہلی: ہندوستانی اسپنر ورون چکرورتی کا خیال ہے کہ اتوار کو کولمبو میں پاکستان کے خلاف ہونے والے اہم میچ میں ابھیشیک شرما کی واپسی ہو سکتی ہے۔
پیٹ میں انفیکشن کی وجہ سے ابھیشیک نامیبیا کے خلاف میچ میں حصہ نہیں لے سکے تھے۔ اس سے پہلے دہلی پہنچنے پر جانچ کے لیے انہیں اسپتال میں داخل بھی ہونا پڑا تھا، تاہم بعد میں انہیں چھٹی دے دی گئی اور وہ نامیبیا کے خلاف میچ سے قبل میدان میں بھی موجود تھے۔ وہیں ورلڈ کپ میں ان کا ڈیبیو کچھ خاص نہیں رہا تھا اور وہ امریکہ کے خلاف پہلے میچ میں صفر پر آؤٹ ہو گئے تھے۔
ورون نے کہا کہ "مجھے لگتا ہے کہ وہ اگلا میچ کھیلیں گے۔ میں یقین سے تو نہیں کہہ سکتا، لیکن میری ان سے جتنی بات ہوئی ہے، وہ ٹھیک لگ رہے ہیں۔ انہوں نے آج کچھ پریکٹس بھی کی ہے اور کہا کہ وہ واپسی کی راہ پر ہیں۔”
یہ بیان ہندوستانی کپتان سوریہ کمار یادو کے ٹاس کے وقت دیے گئے بیان سے زیادہ مثبت اشارہ ہے۔ کپتان نے کہا تھا کہ "انہیں ایک دو میچ لگ سکتے ہیں، مجھے نہیں معلوم۔”
میچ کے بعد ارشدیپ سنگھ کی ایک سوشل میڈیا ویڈیو میں بھی ابھیشیک نظر آئے، جس میں وہ یہ کہتے سنائی دیے کہ وہ اب ٹھیک ہیں لیکن ان کا وزن کچھ کم ہو گیا ہے۔
ابھیشیک کی غیر موجودگی میں سنجو سیمسن نے اننگز کا آغاز کیا اور آٹھ گیندوں پر 22 رنز بنائے۔ تاہم، دوسرے اوپنر ایشان کشن نے وکٹ کیپنگ کی ذمہ داری سنبھالی، جس سے یہ اشارہ ملتا ہے کہ فی الحال سیمسن بیک اپ اوپنر ہی ہیں۔ ایشان کشن نے شاندار نصف سنچری بنا کر ٹیم میں اپنی جگہ مزید مضبوط کر لی ہے۔
