وزیر زراعت ٹی ناگیشور راؤ نے جائزہ حاصل کرلیا

حیدرآباد: ریاستی وزیر زراعت، امداد باہمی، مارکیٹنگ،ہینڈلوم وٹکسٹائل تملا ناگیشور راؤ نے جمعہ کے روز سکریٹریٹ میں اپنے چیمبر میں جائزہ حاصل کرلیا۔ اس موقع پر ٹی ناگیشو ر راؤ نے تین فائلوں پر دستخط کئے۔ پہلی فائل 1050کروڑ کے تخمینہ مصارف سے ریاست میں 5 آئیل پام پروسسنگ ملس قائم کرنے کی منظوری سے مربوط ہے۔ ان ملس کے قیام کا مقصد، آئیل پام کی کاشت کو فروغ دینا ہے۔

 انہوں نے دوسری فائل جو110 رعیتو ویدیکاؤں میں ویڈیو کانفرنس نظام قائم کرنے سے مربوط ہے، پر دستخط کئے یہ کام مرحلہ وار اساس پر انجام دیا جائے گا جس کیلئے4.07کروڑ روپے خرچ ہوں گے۔

 انہوں نے امداد باہمی، رجسٹرار امداد باہمی سوسائٹی کے دفتر کمشنر اور اضلاع میں بھی امداد باہمی کے دفاتر میں کمپیوٹر سرگرمیوں کے آغاز کے مشن کی منظوری دے دی۔ اس موقع پر ڈپٹی چیف منسٹربھٹی وکرامارکہ، سکریٹری زراعت رگھونندن راؤ، ڈائرکٹر گوپی، اور دیگر عہدیدارموجود تھے۔