آندھرا پردیش کے نائب وزیر اعلیٰ پون کلیان کی قبائلی عوام سے خصوصی محبت، آموں کا انوکھا تحفہ

حیدرآباد: آندھرا پردیش کے نائب وزیر اعلیٰ اور فلم اداکار پون کلیان نے قبائلی عوام سے اپنی خصوصی محبت اور ہمدردی کا ثبوت دیتے ہوئے الوری ضلع کے کریڈی گاؤں کے افراد کو آموں کا خاص تحفہ بھیجا۔

پون کلیان نے اپنے ذاتی باغ میں اگائے گئے 300 اقسام کے آم منتخب کروا کر ان گاؤں والوں تک پہنچائے۔

ان کی ہدایت پر متعلقہ عہدیداروں نے گھر گھر جا کر یہ آم تقسیم کیے، جس پر گاؤں والوں نے خوشی کا اظہار کیا۔ حال ہی میں پون کلیان نے کریڈی گاؤں کا دورہ کیا تھا جہاں انہوں نے مقامی افراد سے ملاقات کرتے ہوئے ان کے مسائل کی سماعت کی اور ان کے حل کی یقین دہانی کرائی۔

دورہ کے دوران انہوں نے گاؤں کے قدیم شیوالہ مندر میں پوجا بھی کی ۔ گاؤں والوں نے کہا کہ پون کلیان نے نہ صرف ان کے مسائل سنے بلکہ یہ بھی وعدہ کیا کہ وہ دکھ اور سکھ میں ان کے ساتھ کھڑے رہیں گے۔ ان کی اس محبت اور عملی اظہار پر مقامی عوام نے خوشی اور اطمینان کا اظہار کیا۔