اسدالدین اویسی کا قلی قطب شاہ گورنمنٹ کالج کا دورہ، فاکس کان نے کالج کو اپنانے کی خواہش ظاہر کی

حیدرآباد: اے آئی ایم آئی ایم صدر و رکن پارلیمنٹ حیدرآباد بیرسٹر اسدالدین اویسی نے بہادرپورہ کے رکن اسمبلی محمد مبین، ٹی ایم آر ای آئی ایس کے چیئرمین فہیم قریشی اور فاکس کان (Foxconn) کمپنی کے ڈائریکٹر کے ساتھ رام نستھاپور–بہادرپورہ میں واقع قلی قطب شاہ گورنمنٹ پالی ٹیکنک کالج کا دورہ کیا۔

اس موقع پر وفد نے کالج کے تعلیمی نظام، بنیادی ڈھانچے، لیبارٹریز، کلاس رومز، آلات اور دیگر ضروری سہولیات کا تفصیلی جائزہ لیا۔ اسدالدین اویسی اور دیگر عہدیداروں نے اسٹاف سے ملاقات کرکے کالج کی ضروریات اور مسائل پر بھی گفتگو کی۔

دورے کے دوران ایک اہم پیش رفت سامنے آئی، جہاں فاکس کان کمپنی نے کالج کو اپنانے (اڈوپٹ کرنے) اور اس کی ترقی میں تعاون کرنے کی خواہش ظاہر کی۔ کمپنی نے کالج میں جدید ٹیکنالوجی، ساز و سامان اور تعلیمی معیار کی بہتری کے لیے تعاون کا اشارہ دیا۔

عہدیداروں کے مطابق اس اقدام کا مقصد نہ صرف تعلیمی معیار کو بہتر بنانا ہے بلکہ طلبہ کو عصری ٹیکنالوجی اور صنعتی مہارتوں سے آراستہ کرنا بھی ہے، جس سے ان کے مستقبل کے روزگار کے مواقع میں اضافہ ہوگا۔

مقامی نمائندوں نے اس پیش رفت کا خیرمقدم کرتے ہوئے کہا کہ صنعت و تعلیم کے درمیان اس طرح کے اشتراکات نوجوانوں کی صلاحیتوں کو نکھارنے اور انہیں بہتر مواقع فراہم کرنے میں اہم کردار ادا کریں گے۔

کالج کی ترقی اور مستقبل کے منصوبوں کو حتمی شکل دینے کے لیے فاکس کان اور متعلقہ محکموں کے درمیان آئندہ ہفتوں میں مزید مشاورت متوقع ہے۔