فیک نیوز پھیلانے والے چیانلس کے خلاف کاروائی کرنے اسدالدین اویسی کی دھمکی

امراوتی: صدرآل انڈیا مجلس اتحادالمسلمین اسدالدین اویسی نے اتوار کے دن الزام عائدکیاکہ بعض نیوزچیانلس غلط رپورٹنگ کررہے ہیں کہ مہاراشٹرا کے ضلع بلڈھانہ میں ان کی ریالی میں مغل شہنشاہ اورنگ زیب کے حق میں نعرے لگے۔

اسداویسی نے ”فیک نیوز“ پھیلانے والے ان ٹی وی چینلس کے خلاف کاروائی کرنے کی دھمکی دی۔ انہوں نے کہا کہ ملکاپورریالی میں پولیس موجود تھی۔ آپ (چیانلس) جھوٹی براڈکاسٹنگ کررہے ہو۔

 مسلمانوں سے کتنی نفرت کروگے؟ میں‘ آپ لوگوں کے خلاف مقدمہ درج کراؤں گا۔ اسی دوران ڈپٹی چیف منسٹر مہاراشٹرا دیویندرفڈنویس سے جب اس سلسلہ میں پوچھا گیاتو انہوں نے کہا کہ مجھے تعجب ہے کہ ”اورنگ زیب کی یہ اولادیں“ اچانک ریاست میں کہاں سے آگئیں۔

مہاراشٹرا اور سارے ملک کے مسلمان اورنگ زیب کی اولاد نہیں ہیں۔ بہت جلد پتہ چل جائے گا کہ ایسے نعرے کس نے لگائے اور کس کی ایماء پر لگائے۔ فڈنویس کے پاس‘ داخلہ کا قلمدان بھی ہے۔