حکومت سازی کے سلسلہ میں این ڈی اے کی اہم میٹنگ، بابو بھی کریں گے شرکت

نئی دہلی: ملک میں نئی ​​حکومت کی تشکیل کے سلسلے میں بھارتیہ جنتا پارٹی (بی جے پی) کی قیادت والے قومی جمہوری اتحاد (این ڈی اے) کی بدھ کو قومی دارالحکومت میں میٹنگ ہونے جا رہی ہے بہار کے وزیر اعلی نتیش کمار اور تیلگو دیشم پارٹی (ٹی ڈی پی) کے سربراہ این چندرا بابو نائیڈو بھی میٹنگ میں موجود رہیں گے ۔

 اس کے ساتھ ہی شیو سینا کے سربراہ ایکناتھ شندے بھی میٹنگ میں شرکت کریں گے وزیر اعظم نریندر مودی لوک سبھا انتخابات 2024 کے نتائج کے اعلان کے ایک دن بعد ہونے والی میٹنگ کی صدارت کریں گے۔ میٹنگ میں حکومت سازی کے لیے آئندہ کی حکمت عملی طے کی جائے گی۔ بی جے پی اکیلے 545 رکنی لوک سبھا میں مکمل اکثریت کے لیے 272 سیٹیں حاصل نہیں کر سکی ہے۔

الیکشن کمیشن آف انڈیا کے اعداد و شمار کے مطابق مسلسل تیسری بار اقتدار میں آنے کے لیے اکثریت حاصل کرنے کی کوشش کرنے والی بی جے پی کو صرف 240 سیٹیں ملیں۔

 این ڈی اے میں پارٹیوں کے ارکان سمیت یہ تعداد بڑھ کر 292 ہوگئی ہے۔ مودی کی قیادت والی بی جے پی اب حکومت بنانے کے لیے اپنے اتحادیوں پر منحصر ہے۔

سال 2019 میں بی جے پی نے اپنے بل بوتے پر 303 سیٹیں حاصل کیں اور این ڈی اے کو 353 سیٹیں ملی۔ اس سے پہلے 2014 میں بی جے پی کو 282 اور این ڈی اے کو 336 سیٹیں ملی تھیں۔

کمار کی قیادت والی جنتا دل یونائیٹڈ نے اس بار بہار میں 12 سیٹیں جیتی ہیں، جب کہ مسٹر نائیڈو کی قیادت والی ٹی ڈی پی نے آندھرا پردیش میں 16 سیٹیں جیتی ہیں۔ دریں اثنا، مسٹر شندے کی شیو سینا اور اجیت پوار کی نیشنلسٹ کانگریس پارٹی (این سی پی) نے مل کر مہاراشٹر میں 17 سیٹیں جیتیں۔

این ڈی اے کی ایک اور اتحادی لوک جن شکتی پارٹی (رام ولاس) کے سربراہ چراغ پاسوان نے کہا کہ ان کی پارٹی بھی میٹنگ میں شرکت کرے گی۔

دریں اثنا، آج صبح مبینہ طور پر کمار کی راشٹریہ جنتا دل لیڈر تیجسوی یادو کے ساتھ اسی فلائٹ میں ایک تصویر سوشل میڈیا پر وائرل ہوگئی، جس کے بارے میں کئی قیاس آرائیاں کی جا رہی ہیں۔ جے ڈی (یو) رہنما اس سال کے اوائل تک انڈیا گروپ کے ایک اہم شخصیت تھے، لیکن عام انتخابات سے ٹھیک پہلےوہ این ڈی اے میں شامل ہو گئے۔

راشٹریہ جنتا دل، کانگریس، سماج وادی پارٹی، نیشنلسٹ کانگریس پارٹی (شرد پوار)، مارکسی کمیونسٹ پارٹی اور دیگر پارٹیاں انڈیا گروپ کا حصہ ہیں۔ انڈیا گروپ کی میٹنگ بھی آج دہلی میں ہوگی۔