ایرپا اسپتال میں 5 کلو 200 گرام وزنی بچہ کی پیدائش

حیدرآباد: تلنگانہ کے بھدرا دری کوتہ گوڑم ضلع کے بھدراچلم ایریا اسپتال میں ایک حیرت انگیز واقعہ پیش آیا ہے جہاں ایک خاتون نے 5 کلو 200 گرام وزنی بچہ کو جنم دیا ہے۔

عام طور پر نوزائیدہ بچوں کا وزن 2.5 سے 3 کلوگرام کے درمیان ہوتا ہے لیکن اتنے وزنی بچہ کی پیدائش نے علاقہ میں سب کو حیران کر دیا ہے۔

تفصیلات کے مطابق سندھیا رانی نامی حاملہ خاتون کو زچگی کے لئے بھدراچلم ایریا اسپتال میں داخل کیا گیا تھا۔ معائنہ کے دوران ڈاکٹروں نے پایا کہ بچہ کا وزن معمول سے کہیں زیادہ ہے جس کی وجہ سے زچگی ماں اور بچہ دونوں کے لئے خطرناک ثابت ہو سکتی تھی۔

ایسی پیچیدہ صورتحال کے باوجود ڈاکٹروں کی ٹیم نے انتہائی مہارت اور چوکسی کا مظاہرہ کرتے ہوئے کامیاب آپریشن انجام دیا۔ ڈاکٹروں نے تصدیق کی ہے کہ 5.2 کلوگرام وزنی یہ بچہ اور اس کی ماں سندھیا رانی دونوں مکمل طور پر صحت مند ہیں۔

سرکاری اسپتال میں اس طرح کے نایاب اور مشکل کیس کو کامیابی سے سنبھالنے پر اسپتال انتظامیہ اور خاتون کے رشتہ داروں نے خوشی کا اظہار کیا ہے۔ اعلیٰ حکام نے بھی ڈاکٹروں اور عملہ کی اس کامیابی کو سراہتے ہوئے کہا کہ یہ واقعہ ثابت کرتا ہے کہ بھدراچلم ایریا اسپتال دور دراز علاقوں کے افرادکو کارپوریٹ سطح کی طبی سہولیات فراہم کر رہا ہے۔