شیخ حسینہ کا دورہ ہند متوقع

ڈھاکہ: وزیراعظم بنگلہ دیش شیخ حسینہ توقع ہے کہ ستمبر میں G20 چوٹی کانفرنس میں شرکت کیلئے ہندوستان آئیں گی۔

ان کے ہندوستانی ہم منصب نے انہیں دعوت نامہ بھیجا ہے۔ وزارت خارجہ کے ایک عہدیدار نے اتوار کے دن ڈھاکہ میں یہ بات بتائی۔ G20 لیڈرس چوٹی کانفرنس جاریہ سال 9اور10 ستمبر کو نئی دہلی میں ہونے والی ہے۔

وزارتِ خارجہ کے ایک عہدیدار نے بتایاکہ بنگلہ دیش G20 کا رکن نہیں ہے لیکن اس کے باوجود شیخ حسینہ بطور مہمان چوٹی کانفرنس میں شرکت کریں گی۔

امکان ہے کہ وہ G20 چوٹی کانفرنس کے حاشیہ پر اپنے ہندوستانی ہم منصب سے ملاقات کریں گی۔ دونوں ممالک میں آئندہ سال عام انتخابات ہونے والے ہیں۔

اس طرح یہ دونوں کی آخری ملاقات ہوسکتی ہے۔ بنگلہ دیش جنوبی ایشیاء کا واحد ملک ہے جسے چوٹی کانفرنس میں مدعو کیاگیا ہے۔

دیگر غیرارکان ممالک میں مصر‘ ماریشیس‘ نیدرلینڈس‘ نائیجیریا‘ عمان‘سنگاپور‘ اسپین اور متحدہ عرب امارات کو بھی دعوت نامے بھیجے گئے ہیں۔