حیدرآباد: صدرنشین تلنگانہ قانون ساز کونسل جی سکھیندر ریڈی نے دعوی کیا ہے کہ کرناٹک میں بُری طرح شکست کے باوجود بی جے پی کے لیڈروں کو عقل نہیں آرہی ہے۔
فرقہ وارانہ فسادات کروانا اور اقتدار حاصل کرنا بی جے پی کا مقصد ہے جس کی سازش کی جارہی ہے۔
انہوں نے نلگنڈہ کے کیمپ آفس میں میڈیا سے بات کرتے ہوئے کہا کہ کانگریس ابھی تک ہوش میں نہیں آ رہی ہے، چار دن گزرنے کے بعد بھی پارٹی کرناٹک میں وزیر اعلیٰ کا فیصلہ نہیں کرپائی ہے۔
عوام کو اب سوچنا چاہیے کہ یہ کانگریس پارٹی ملک کی قیادت کیسے کرے گی۔
انہوں نے کہاکہ تلنگانہ میں کانگریس اور بی جے پی پارٹیاں نہیں چلیں گی بلکہ تلنگانہ میں بی آرایس کا سکہ چلتا ہے۔
انہوں نے کہا کہ ہم راجستھان میں کانگریس میں انتشار دیکھ رہے ہیں۔
وہاں سیاسی عدم استحکام کی صورتحال بنی ہوئی ہے۔عوام کو جنونی بی جے پی اور بے سمت کانگریس پارٹیوں سے ہوشیار رہنا چاہیے۔
انہوں نے پیش گوئی کی کہ کانگریس پارٹی اندرونی اختلافات کی وجہ سے ٹوٹ جائے گی۔
