مہاراشٹرا اسمبلی الیکشن میں حصہ نہ لینے بی آر ایس کا فیصلہ

حیدرآباد (منصف نیوز بیورو) بی آر ایس کے سابق وزیر ورکن اسمبلی ٹی ہریش راو نے کہا کہ بی آر ایس نے مہاراشٹرا کے اسمبلی انتخابات میں حصہ نہ لینے کا فیصلہ کیا ہے۔ مہاراشٹرا میں بی آر ایس سیاسی طور پر طاقتور نہیں ہے اس لئے ہم نے مہاراشٹرا کے اسمبلی انتخابات سے دوری اختیار کی ہے۔

انہوں نے چیف منسٹر ریونت ریڈی پر الزام عائد کیا کہ وہ مہاراشٹرا کے اسمبلی انتخابات کے لئے پارٹی کو رقم روانہ کرنے میں مصروف ہیں۔ ٹی ہریس راؤ نے آج تلنگانہ بھون میں اخباری نمائندوں سے بات کرتے ہوئے کہا کہ ریاستی وزراء ریاست کی حکمرانی پر توجہ دینے کے بجائے مہاراشٹرا میں کانگریس اُمیدواروں کی تائید میں مہم چلا رہے ہیں۔

انہوں نے کہا کہ بی آر ایس مہاراشٹرا کے انتخابات میں کسی بھی سیاسی جماعت کی تائید نہیں کررہی ہے۔ انہوں نے کہا کہ ریونت ریڈی مہاراشٹرا میں عوامی جلسوں سے خطاب کرتے ہوئے عوام سے جھوٹ بول رہے ہیں۔

جبکہ کانگریس تلنگانہ میں اقتدار پر فائز ہونے کے11 ماہ بعد عوام سے 6 ضمانتوں اور تمام کسانوں کا2لاکھ روپے قرض معاف کرنے کے وعدوں کو پورا کرنے پر کوئی توجہ نہیں دے رہی ہے۔ انہوں نے کہا کہ مہاراشٹرا میں ریونت ریڈی نے 40لاکھ کسانوں کا قرض معاف کرنے کا جھوٹا بیان دیا ہے جبکہ حکومت نے 22 لاکھ کسانوں کا قرض معاف کیا ہے۔