اتراکھنڈ میں بس کھائی میں گرپڑی، 36 مسافرین ہلاک (ویڈیو)

دہرہ دون (پی ٹی آئی) اتراکھنڈ کے ضلع المورہ میں پیر کے دن ایک خانگی بس گہری کھائی میں جاگری۔ بس میں سوار تقریباً 60 افراد کے منجملہ 36 ہلاک ہوگئے۔ زخمیوں کی تعداد 24 بتائی جاتی ہے۔

چیف منسٹر پشکر سنگھ دھامی نے مہلوکین کے ورثا کو فی کس 4 لاکھ روپے معاوضہ اور زخمیوں کو ایک لاکھ روپے کی مالی امداد دینے کا اعلان کیا۔

4 زخمیوں کی حالت نازک ہے جن میں 3 کو ہیلی کاپٹر کے ذریعہ ایمس رشی کیش منتقل کیا گیا اور ایک زخمی کو ہلدوانی کے سشیلا تیواری ہاسپٹل لے جایا گیا۔ المورہ ڈسٹرکٹ ڈیزاسٹر مینجمنٹ کے عہدیدار ونیت پال نے یہ بات بتائی۔ 43 نشستی بس میں 60 افراد سوار تھے۔

انہوں نے کہا کہ گنجائش سے زائد مسافرین کے باعث حادثہ پیش آیا ہوگا۔ ضلع مجسٹریٹ(کلکٹر)آلوک کمار پانڈے نے کہا کہ گڑھوال موٹر اونر اسوسی ایشن کی طرف سے چلائی جانے والی یہ بس پوری گڑھوال سے رام نگر (کماؤں) جارہی تھی۔

صبح 8 بجے کے آس پاس حادثہ پیش آیا۔ رام نگر سے 35 کیلو میٹر پہلے یہ بس 200 میٹر گہری کھائی میں جاگری۔ پولیس اور این ڈی آر ایف کا عملہ وہاں پہنچ گیا اور اس نے ریسکیو آپریشن شروع کردیا۔

پوری اور المورہ کے اسسٹنٹ ریجنل ٹرانسپورٹ آفیسرس کو معطل کردیا گیا۔ مجسٹرئیل انکوائری کا حکم دے دیا گیا۔