ہاردیک پانڈیا کے چھکے سے کیمرہ مین زخمی، کھلاڑی نے معافی مانگ کر پوچھا حال

احمد آباد : ہندستانی آل راؤنڈر ہاردیک پانڈیا نے جنوبی افریقہ کے خلاف سیریز کے پانچویں اور آخری بین الاقوامی ٹی-20 میچ کے دوران اپنے چھکے سے زخمی ہونے والے کیمرہ مین سے معافی مانگی اور ان کا حال پوچھا۔

گزشتہ شب کھیلے گئے اس مقابلے میں پانڈیا کی جارحانہ بلے بازی نے میچ میں جان ڈال دی تھی۔ انہوں نے اپنے خاص انداز میں کھیلتے ہوئے گیند بازی کے پرخچے اڑا دئیے۔ ہاردیک کی بلے بازی کے دوران ایک گیند کیمرہ مین کے ہاتھ پر جالگی جس سے کیمرہ مین شدید طور پر زخمی ہوگیا۔

بی سی سی آئی کی جانب سے شیئر کیے گئے ایک ویڈیو میں کیمرہ مین نے کہا کہ وہ ٹھیک ہے ۔ فوری طبی مدد کے بعد کیمرہ مین نے اپنا کام جاری رکھا۔ اس نے کہا کہ اگر گیند اسے کہیں اور لگتی تو صورتحال اور بھی سنگین ہو سکتی تھی۔

میچ ختم ہونے کے فوراً بعد ہاردیک پانڈیا براہِ راست اس کیمرہ مین کے پاس پہنچے اور اس کا حال دریافت کیا۔