ڈی جے ساؤنڈ لگانے پر میئر وجئے لکشمی کے خلاف کیس درج

حیدرآباد (منصف نیوز بیورو) بنجارہ ہلز پولیس نے ممنوعہ ڈی جے ساؤنڈ لگانے پر گریٹر حیدرآباد میونسپل کارپوریشن کی میئر اوردیگر 2 افراد کے خلاف کیس درج کرلیا ہے۔

ذرائع کے بموجب تاخیر سے ملنے والی اطلاع پر بتایا گیا کہ بنجارہ ہلز کے ایم بی ٹی نگر میں میئر جی وجئے لکشمی کی نگرانی میں بتکماں تہوار کے موقع پر رات کے 11:45 بجے زور دار آواز کے ڈی جے ساؤنڈ چلایا جارہا تھا۔

اس موقع پر بنجارہ ہلز پولیس نے پہونچ کر اس پر اعتراض کیا تو میئر وجئے لکشمی نے پولیس عہدیداروں پر برہمی کا اظہار کیا۔ جبکہ مذہبی تہواروں میں ڈی جے ساؤنڈ کے استعمال پر پابندی عائد کردی گئی ہے۔

پولیس ملازمین نے اس واقعہ کی اطلاع اپنے اعلیٰ عہدیداروں کو دی پولیس نے گریٹر حیدرآباد کی میئر جی وجئے لکشمی‘ آرگنائزر وجئے کمار اور ڈی جے ساؤنڈ منیجر غوث کے خلاف مقدمہ درج کرلیا۔