آدتیہ ایلI کی کامیاب پرواز، اسرو کے سائنسدانوں کو چیف منسٹر کے سی آر کی مبارکباد

حیدرآباد: اسرو کی جانب سے آدتیہ۔ایل I اسپیس کرافٹ کو کامیابی کے ساتھ لانچ کئے جانے پر چیف منسٹر کے چندر شیکھر راؤ نے مسرت کا اظہار کرتے ہوئے اسرو کے سائنسدانوں کو مبارکباد پیش کی۔

کے سی آر نے کہا کہ اسپیس کرافٹ کو کامیابی کے ساتھ داغا جانا خلائی تحقیق کے شعبہ میں ہندوستان کو حاصل ہورہی اہمیت کا آئنہ دار ہے اور اس طرح اسرو کی ٹیم نے ایک اور سنگ میل عبور کیا ہے۔

 انہوں نے کہا کہ ہندوستان کے خلائی سائنسداں نے عالمی سطح پر اپنی صلاحیتوں کا لوہا منوایا ہے جس پر ہر ہندوستانی کا سر فخر سے اونچا ہوگیا ہے۔

انہوں نے صدرنشین اسرو، سائنسدانوں اور دوسرے اراکین کو اس کامیابی پر مبارکباد دیتے ہوئے مستقبل میں مزید کامیابیوں کیلئے نیک تمناؤں کا اظہار کیا۔ واضح رہے کہ آج11:50 بجے دن اسرو کی جانب سے اسپیس کرافٹ آدتیہ۔ایل I کو کامیابی کے ساتھ داغا گیا۔1.04منٹ پر آدتیہ۔ایلI سے علیحدہ ہوگیا اور مقرر کردہ مدار میں داخل ہوگیا۔