تلنگانہ اور اے پی میں سردی کی شدت میں اضافہ

حیدرآباد: دونوں تلگو ریاستوں تلنگانہ اوراے پی میں سردی کی شدت روز بروز بڑھتی جا رہی ہے۔ محکمہ موسمیات کے حکام کے مطابق ریاست تلنگانہ کے بعض علاقوں میں اقل ترین درجہ حرارت معمول سے تین تا چار ڈگری کم رہنے کا امکان ہے۔

انہوں نے بتایا کہ شمالی تلنگانہ، وسطی تلنگانہ، مشرقی تلنگانہ اور مغربی تلنگانہ کے بعض علاقوں میں کل سرد ہوائیں چلنے کا امکان ہے۔ تلنگانہ میں ہفتہ کو مختلف علاقوں میں ریکارڈ درجہ حرارت اس طرح رہے: عادل آباد 6.7 ڈگری، پٹن چیرو 6.8، میدک 7.5، راجندر نگر 8.5، ہنمکنڈا 10، حیدرآباد 11، راما گنڈم 11.5، ڈنڈیگل 11.6، حیات نگر 12، نظام آباد 12، کھمم 13، نلگنڈہ 13.6، بھدراچلم 14، محبوب نگر 14.1 اور حکیم پیٹ 15.5 ڈگری۔

ادھر آندھرا پردیش میں بھی یہی صورتحال ہے۔ خاص طور پر الوری ضلع کے پاڈیرو ایجنسی علاقہ میں سردی کی شدت عروج پر پہنچ گئی ہے۔ گھنی کہرچھا جانے سے درجہ حرارت واحد ہندسہ تک پہنچ رہا ہے۔

ہفتہ کو منی مالورومیں 5 ڈگری،اراکو میں 5 ڈگری درجہ حرارت ریکارڈ کیا گیا۔ سردی کی شدت سے بچنے کے لئے قبائلی لوگ الاؤ جلا رہے ہیں۔ گھنی کہر چھائے رہنے کی وجہ سے سڑکوں پر گاڑی چلانے والے ہیڈ لائٹس آن کر کے سفر کر رہے ہیں۔ حکام نے خبردار کیا ہے کہ آئندہ مزید 3 دن تک سرد ہواؤں کی شدت برقرار رہنے کا امکان ہے۔