تلنگانہ کے عوام کو کھڑگے، راہول اور پرینکا کی مبارکباد

نئی دہلی: کانگریس نے جمعہ کے روز تلنگانہ کے عوام کو ریاست کی یوم تاسیس کی مبارکباد دی اور علیحدہ تلنگانہ کی تشکیل میں کانگریس کی سابق صدر سونیا گاندھی کے رول کی ستائش کی۔

صدر کل ہند کانگریس ایم ملکارجن کھر گے نے ٹوئٹ کرتے ہوئے کہا کہ ریاست کی یوم تاسیس کی تلنگانہ کے عوام کو ہماری جانب سے بہت بہت مبارکباد۔ عوام کی ان گنت امنگوں اور خوابوں کے ساتھ نئی ریاست تلنگانہ کی تخلیق ہوئی ہے۔

 ہمیں فخر ہے کہ کانگریس اور سونیا گاندھی نے عوام کی خواہشات اور ان کے خوابوں کی ریاست کے قیام کیلئے کام کیا ہے۔ کانگریس پارٹی سابق سربراہ راہول گاندھی جو امریکہ کے دورہ پر ہیں نے ٹوئٹ کرتے ہوئے کہا کہ ہندوستان کی نئی ریاست تلنگانہ کے عوام لچکدار جذبہ کیلئے جانے جاتے ہیں۔

انہوں نے کہا کہ کانگریس ہمیشہ ایک شاندار تلنگانہ، ایک ماڈل ریاست جو یہاں کے کسانوں، نوجوانوں، خواتین کیلئے خوشحالی لائے گی، کیلئے کوشاں ہے۔ٹوئٹ کرتے ہوئے راہول گاندھی نے تلنگانہ کی یوم تاسیس کی ریاست کے عوام کو مبارکباد دی۔

دریں اثنا کانگریس کی جنرل سکریٹری پرینکا گاندھی نے بھی ٹوئٹ کرتے ہوئے ریاست کے عوام کو تلنگانہ فارمیشن ڈے کی مبارکباد دی۔ انہوں نے اپنے حالیہ دورہ تلنگانہ کا ایک ویڈیو پوسٹ کرتے ہوئے کہا کہ آج کے دن ہی 2 جون2014 کو تلنگانہ کا قیام عمل میں لایا گیا۔

 ہمیں ان نوجوانوں کو خراج پیش کرنا چاہئے جنہوں نے امنگوں کی ریاست تلنگانہ کی تشکیل کیلئے اپنی قیمتی جانوں کا نذرانہ پیش کیا ہے۔