کانگریس پارٹی آندھراپردیش میں بھی نشستوں پر کامیابی حاصل کرے گی: سریدھربابو

حیدرآباد: تلنگانہ کے وزیرانفارمیشن ٹکنالوجی سریدھربابو نے امید ظاہر کی ہے کہ کانگریس پارٹی آندھراپردیش میں بھی نشستوں پر کامیابی حاصل کرے گی۔

انہوں نے میڈیاسے بات کرتے ہوئے کہا کہ پڑوسی ریاست میں انتخابی مہم شدت کے ساتھ جاری ہے۔ہماری قیادت نے اس مرتبہ کانگریس کے سینئر لیڈروں کو امیدوارکے طورپر اتارا ہے۔

کانگریس پارٹی کی قیادت پر بھروسہ سے یقینی طورپر ہمارے لئے بہتر نتائج سامنے آئیں گے کیونکہ ہر کوئی تبدیلی چاہتا ہے اور تبدیلی ضرورت بن گئی ہے۔

متحدہ آندھراپردیش کی تقسیم کے بعد تلگودیشم پارٹی نے تقریبا پانچ سال تک اُ س ریاست پر حکومت کی تھی،بعد ازاں عوام نے وائی ایس آرکانگریس کو خط اعتماددیا۔

یہ دونوں جماعتیں تقریبا دس برس تک برسراقتدارتھیں۔عوام کا یہ احساس ہے کہ ریاست کی بہبود اورترقی کو نظراندازکیاگیا۔عوام کو یہ بھی بھروسہ ہے کہ کانگریس جو بھی کہے گی اس پر یقینی طورپر عمل کرے گی۔

مرکز میں کانگریس کے برسراقتدارآنے کے بعد آندھراپردیش تنظیم جدید قانون میں جو بھی وعدے کئے گئے ہیں، اس پر عمل کو یقینی بنایاجائے گا۔