سری لنکا میں سائبر جرائم میں اضافہ، سال 2025 میں 12,650 سے زائد شکایات درج، سوشل میڈیا بڑا ذریعہ

کولمبو: نئے سال کے آغاز کے ساتھ سری لنکا کی قومی سائبر رسپانس ایجنسی نے تشویشناک اعداد و شمار جاری کیے ہیں۔ سال 2025 کے دوران ملک میں سوشل میڈیا کے غلط استعمال اور سائبر جرائم سے متعلق 12,650 سے زائد شکایات درج کی گئیں۔

سری لنکا کمپیوٹر ایمرجنسی ریڈی نیس ٹیم ایجنسی کے مطابق، موصول ہونے والی شکایات میں سب سے زیادہ تعداد سوشل میڈیا پر جعلی پروفائل بنانے اور موجودہ اکاؤنٹس کو ہیک کرنے سے متعلق ہے۔

اس کے علاوہ مالیاتی دھوکہ دہی، آن لائن مالی فراڈ، ڈیجیٹل ادائیگیوں سے جڑے گھوٹالے، سائبر ہراسانی یا سائبر بُلنگ، اور توہین آمیز مواد کی تشہیر بھی بڑے جرائم کی اقسام میں شامل ہیں۔

ایجنسی کے انفارمیشن سکیورٹی انجینئر چاروکا دَمُنوپولا کے مطابق گمراہ کن معلومات اور جھوٹی خبروں میں اضافہ بھی ایک بڑی چیلنج کے طور پر سامنے آیا ہے۔ انہوں نے عوام اور اداروں کو مشورہ دیا ہے کہ ڈیجیٹل پلیٹ فارمز کا استعمال کرتے وقت غیر معمولی احتیاط برتیں۔

ایجنسی نے اس بات پر زور دیا ہے کہ کسی بھی مشتبہ سرگرمی کی اطلاع ملنے پر بلا تاخیر شکایت درج کرانی چاہیے۔ اس سے نہ صرف مالی اور ذاتی نقصانات کو کم کرنے میں مدد ملتی ہے بلکہ تفتیشی اداروں کو مجرموں تک جلد پہنچنے میں بھی سہولت ہوتی ہے۔