وزیر سیتکا کے حلقہ میں خستہ حال سڑکیں، میت کی تدفین کے لیے کیچڑ سے گزرنا پڑا

ملوگو: وزیر سیتکا کے اسمبلی حلقہ ملوگو کے ایٹوروناگارم منڈل کے ایلی سیٹی پلی گاؤں میں سڑکوں کی خستہ حالی نے مقامی افراد کے لیے شدید مشکلات پیدا کردی ہیں۔ گاؤں میں شمشان گھاٹ تک مناسب سڑک نہ ہونے کے باعث دیہاتیوں کو ایک میت کو کیچڑ سے گزرتے ہوئے لے جانا پڑا۔

مقامی افراد کے مطابق گاؤں سے شمشان گھاٹ تک جانے والی سڑک انتہائی خراب حالت میں ہے۔ حالیہ بارشوں کے بعد راستہ کیچڑ سے بھر گیا، جس کے باعث میت کو لے جانے میں اہل خانہ اور دیگر افراد کو شدید دشواری کا سامنا کرنا پڑا۔

دیہاتیوں نے بتایا کہ خراب راستے پر میت کو چارپائی نما بانس کی کھٹولی پر لے جایا جا رہا تھا کہ سڑک کی خستہ حالی کے باعث میت بھی کھٹولی سے گر گئی۔

اس واقعہ پر مقامی افراد میں شدید برہمی پائی جاتی ہے۔ ان کا کہنا ہے کہ بنیادی سہولتوں میں شامل سڑک بھی دستیاب نہ ہونے کے باعث انہیں نہ صرف روزمرہ آمدورفت بلکہ ہنگامی حالات میں بھی شدید مشکلات کا سامنا کرنا پڑتا ہے۔

مقامی لوگوں نے حکومت اور متعلقہ عہدیداروں سے مطالبہ کیا ہے کہ شمشان گھاٹ تک فوری طور پر پختہ سڑک تعمیر کی جائے اور گاؤں کی خستہ حال سڑکوں کی مرمت کی جائے، تاکہ مستقبل میں کسی خاندان کو میت منتقل کرنے کے دوران ایسی مشکلات کا سامنا نہ کرنا پڑے۔