مکہ اور مدینہ میں درجنوں ہوٹل اور فرنشڈ اپارٹمنٹ بند کرادیئے گئے

مکہ مکرمہ: مکہ مکرمہ اور مدینہ منورہ میں سعودی وزارت سیاحت کی تفتیشی ٹیموں نے کارروائی کرتے ہوئے 330 ہوٹلوں اور فرنشڈ اپارٹمنٹس کو مقررہ سہولتیں فراہم نہ کرنے پر بند کرادیا ہے۔

غیر ملکی ذرائع ابلاغ کے مطابق وزارت سیاحت کا اس حوالے سے کہنا ہے کہ تفتیشی ٹیموں نے مکہ مکرمہ اور مدینہ منورہ میں ہوٹلوں اور فرنشڈ اپارٹمنٹس کے 4 ہزار سے زائد تفتیشی دورے کیے۔

رپورٹ کے مطابق تفتیشی ٹیموں کی جانب سے کارروائیوں کے دوران دو ہزار سے زیاد خلاف ورزیاں ریکارڈ کیں جہاں سیاحت کے حوالے سے مقررہ سہولتیں فراہم نہیں کی گئی تھیں۔ مکہ مکرمہ میں 280 جبکہ مدینہ منورہ میں 50 سے زائد ہوٹلوں اور قیام گاہوں کو مقررہ سہولتیں فراہم نہ کرنے پر بند کیا گیا۔

وزارت نے سیاحتی خدمات مہیا کرنے والے اداروں کو ہدایت کی ہے کہ وہ معیار کے مطابق سیاحوں کو مروجہ سہولتوں کی فراہمی کو یقینی بنائیں بصورت دیگر ان کے خلاف ایکشن لیا جائے گا۔

ضابطے کی کارروائی کرتے ہوئے نوٹس جاری کیے گئے جبکہ سنگین خلاف ورزی پر ہوٹلوں کو بند بھی کیا گیا۔ انتظامیہ کو ہدایت کردی گئی ہے کہ خلاف ورزیاں دور کیے بغیر ہوٹلوں کو کھولا نہیں جاسکتا۔

وزارت نے اس حوالے سے شکایت درج کرانے کے لیے ٹول فری نمبر 930 جاری کیا ہے، جہاں پر ایسے ہوٹل یا اپارٹمنٹ کے بارے میں شکایت درج کرائی جاسکتی ہے جہاں مقررہ سہولتیں فراہم نہیں کی جا رہیں۔