معمر اور معذور ووٹروں کو گھر بیٹھے ووٹ دینے کی سہولت ملے گی: الیکشن کمیشن

رتلام: مدھیہ پردیش اسمبلی انتخابات نزدیک آرہے ہیں اور الیکشن کمیشن جمہوریت کے اس تہوار کو مزید موثر بنانے کے لیے نئے اقدامات پر غور کر رہا ہے۔ آئندہ اسمبلی انتخابات میں بوڑھے اور پولنگ بوتھ تک نہ پہنچنے والے معذور ووٹروں کو گھر بیٹھے ووٹ دینے کی سہولت فراہم کرنے کی تیاریاں کی جارہی ہیں۔

ڈپٹی ڈسٹرکٹ الیکشن آفیسر اور ایڈیشنل ڈسٹرکٹ مجسٹریٹ ڈاکٹر شالنی سریواستو کے مطابق آئندہ اسمبلی انتخابات میں گھر بیٹھے ووٹ ڈالنے کے لیے ضرورتمند ووٹروں کو سہولیات فراہم کرنے کی تیاریاں کی جارہی ہیں۔

ڈاکٹر سریواستو کے مطابق یہ سہولت اسّی سال سے زیادہ عمر کے ووٹروں، معذور اور کورونا وائرس سے متاثرہ ووٹروں کو فراہم کی جائے گی۔ اس کے لیے انتخابی عمل سے وابستہ ملازمین ووٹر کے گھر پہنچ کر ووٹ حاصل کریں گے۔

الیکشن کمیشن کی جانب سے موصول ہونے والی ہدایات کے مطابق بوڑھے، معذور اور کورونا وائرس سے متاثرہ ووٹروں سے ووٹنگ کرانے کے لیے انتخابی عملے کی ایک الگ ٹیم بنائی جائے گی جو ایسے رائے دہندگان کے گھر جانے سے قبل ایس ایم ایس کے ذریعے انہيں پولنگ کے وقت کے بارے میں آگاہ کرے گی اور پہلے سے طے شدہ وقت کے مطابق غیر حاضر ووٹر کے گھر پہنچ کر ووٹ حاصل کرے گی۔

 ان غیر حاضر ووٹروں کے لیے پوسٹل بیلٹ دستیاب ہوگا جس کے ذریعے وہ اپنا حق رائے دہی استعمال کریں گے۔ یہی نہیں اس پورے عمل کی ویڈیو گرافی بھی کی جائے گی۔