غیر ازدواجی تعلقات کا معاملہ، دوست نے جم ٹرینر کو مبینہ طور پر قتل کردیا

کاکیناڈا: آندھرا پردیش کے کاکیناڈا میں مبینہ غیر ازدواجی تعلقات کے تنازع پر ایک 30 سالہ جم ٹرینر کو اس کے دوست نے مبینہ طور پر قتل کردیا۔ پولیس نے مقدمہ درج کرکے ملزمین کی تلاش شروع کردی ہے۔

متوفی کی شناخت کوڈامتی ستیش ریڈی کے طور پر ہوئی ہے، جو رام کرشناراؤ پیٹ میں جم ٹرینر کے طور پر کام کرتا تھا۔ بتایا جاتا ہے کہ ستیش کی تقریباً ایک سال قبل شادی ہوئی تھی اور اس کی اہلیہ جیا شری حاملہ ہیں۔

ابتدائی اطلاعات کے مطابق ستیش ریڈی اور سائی کرن دوست تھے۔ پولیس کو شبہ ہے کہ ستیش کے مبینہ طور پر سائی کرن کی گرل فرینڈ کے ساتھ تعلقات قائم ہوگئے تھے، جس کے بعد دونوں کے درمیان اختلافات پیدا ہوگئے۔

بتایا جاتا ہے کہ ستیش کی اہلیہ جیا شری کو جب مبینہ تعلقات کا علم ہوا تو انہوں نے سائی کرن کو اس بارے میں اطلاع دی۔ اس کے بعد سائی کرن اور ستیش کے درمیان بارہا جھگڑے ہونے لگے۔

اسی سلسلے میں بدھ کی رات تقریباً 2 بجے سائی کرن اپنے کچھ دوستوں کے ساتھ ستیش ریڈی سے ایک مرتبہ پھر جھگڑنے پہنچا۔ الزام ہے کہ بحث کے دوران سائی کرن نے لکڑی کے ایک ٹکڑے سے ستیش کے سر پر زور دار حملہ کیا۔

پولیس کے مطابق حملے میں لکڑی ٹوٹ گئی، جس کے بعد مبینہ طور پر ٹوٹی ہوئی لکڑی کے نوکیلے حصے سے ستیش کی گردن پر حملہ کیا گیا۔ شدید زخمی ہونے کے باعث ستیش ریڈی کی موقع پر ہی موت ہوگئی۔

واقعے کے بعد پولیس نے قتل کا مقدمہ درج کرلیا ہے۔ پولیس کے مطابق سائی کرن اور دیگر ملزمین واقعے کے بعد سے فرار ہیں اور ان کی تلاش جاری ہے۔

پولیس نے معاملے کی مزید تحقیقات شروع کردی ہیں اور قتل کے اصل محرکات سمیت واقعے سے متعلق تمام پہلوؤں کا جائزہ لیا جا رہا ہے۔