تلنگانہ کے ضلع راجناسرسلہ میں کسانوں کو یوریا کے حصول کیلئے نصف شب تک انتظار کرنا پڑا
انتظار کرنے والوں میں کئی خواتین کسان بھی شامل تھیں جنہوں نے بتایا کہ وہ مجبوری میں دیر رات تک رکنے پر مجبور ہیں۔ ان کا کہنا تھا کہ گزشتہ ایک ماہ سے بار بار سیوا کیندر آنے کے باوجود یوریا کے تھیلے نہیں ملے۔
حیدرآباد: تلنگانہ کے راجنا سرسلہ ضلع کے رودرنگی منڈل، جو ریاستی گورنمنٹ وہپ اور مقامی رکن اسمبلی آدی سرینواس کا آبائی علاقہ ہے، میں کسانوں کو یوریا حاصل کرنے کے لیے جمعہ کی رات دیر گئے تک انتظار کرنا پڑا۔
اطلاعات کے مطابق آس پاس کے دیہات سے کسان دوپہر میں ہی رعیتو سیوا کیندر پہنچنے لگے تھے، تاہم رات 10 بجنے کے باوجود انہیں ان کا حصہ فراہم نہیں کیا گیا۔
انتظار کرنے والوں میں کئی خواتین کسان بھی شامل تھیں جنہوں نے بتایا کہ وہ مجبوری میں دیر رات تک رکنے پر مجبور ہیں۔ ان کا کہنا تھا کہ گزشتہ ایک ماہ سے بار بار سیوا کیندر آنے کے باوجود یوریا کے تھیلے نہیں ملے۔
کچھ کسانوں نے شکوہ کیا کہ سابق بی آر ایس حکومت کے دوران، کے چندر شیکھر راؤ کی قیادت میں کھاد اور دیگر زرعی ضروریات بروقت فراہم کی جاتی تھیں، مگر کانگریس حکومت میں صورتحال مزید خراب ہو گئی ہے۔
خواتین کسانوں نے برہمی کا اظہار کرتے ہوئے کہا کہ وہ اپنے بچوں کو گھر پر چھوڑ کر یوریا کے لیے رودرنگی آئی ہیں، انہوں نے سوال اٹھایا کہ اتنی رات گئے وہ اپنے گاؤں کیسے واپس پہنچیں۔
