محبوب آباد سڑک حادثہ میں باپ بیٹی ہلاک

حیدرآباد: تلنگانہ کے ضلع محبوب آباد میں پیش آئے سڑک حادثہ میں باپ اور بیٹی ہلاک ہوگئے۔ضلع کے ترورمنڈل میں اتوار کی صبح یہ حادثہ پیش آیا۔بتکماں،دسہرہ فیسٹیول کے لئے باپ وینکنا اپنی بیٹی انوشا کو داماد کے مکان سے لینے کیلئے محبوب آباد پہنچا۔

بعد ازاں یہ دونوں باپ بیٹی کے ساتھ ساتھ داماد بائیک پر جارہے تھے کہ تیز رفتارکار کے ڈرائیور نے اس کا توازن کھودیا اور یہ کار،بائیک سے ٹکراگئی۔

حادثہ اتنا شدید تھاکہ باپ اور بیٹی دونوں موقع پر ہی ہلاک ہوگئے جبکہ داماد شدید زخمی ہوگیا۔مقامی افراد نے اس کوعلاج کے لئے اسپتال پہنچایا۔اطلاع ملتے ہی پولیس وہاں پہنچی جس نے اس سلسلہ میں ایک معاملہ درج کرکے جانچ شروع کردی۔