نمس اسپتال کے ایمرجنسی وارڈ میں لگی آگ، مریضوں میں خوف وہراس

حیدرآباد: شہر کے وسط میں واقع نِمس (نظامز انسٹی ٹیوٹ آف میڈیکل سائنسز) اسپتال میں ہفتہ کی شام اچانک آگ بھڑک اُٹھی۔ آگ ایمرجنسی بلاک کی پانچویں منزل پر لگی، جس سے اسپتال میں بھگدڑ مچ گئی۔

جیسے ہی آگ کی اطلاع ملی، نِمس کے اسٹاف نے فوری طور پر پولیس اور فائر بریگیڈ کو اطلاع دی۔ فائر عملہ موقع پر پہنچ کر آگ پر قابو پانے کی کوششوں میں مصروف ہے۔

آگ کی شدت کے باعث اسپتال کے احاطے میں گھنا دھواں پھیل گیا، جس کی وجہ سے مریضوں کو سانس لینے میں دشواری کا سامنا کرنا پڑا۔ خوف کے مارے مریض اور ان کے تیماردار اسپتال سے باہر کی طرف دوڑ پڑے۔

واقعے کی اصل وجہ ابھی تک معلوم نہیں ہو سکی ہے، تاہم اسپتال انتظامیہ اور فائر ڈپارٹمنٹ کی جانب سے تفتیش جاری ہے۔