پہلی مرتبہ سلامتی کونسل نے غزہ میں فوری جنگ بندی کی قرارداد منظور کرلی
امریکہ کا قرارداد کو ویٹو نہ کرنے کا اقدام غزہ میں اسرائیل کی جارحیت پر اس کے اور اس کے اتحادی اسرائیل کے درمیان بڑھتے ہوئے اختلاف کا اشارہ ہے۔
نیویارک: اقوام متحدہ کی سلامتی کونسل نے 7 اکتوبر کے بعد پہلی مرتبہ غزہ میں فوری جنگ بندی کی قرارداد منظور کرلی۔ پیر کو سلامتی کونسل میں پیش کی گئی قرارداد پر امریکا نے اپنے سابقہ موقف میں تبدیلی کرتے ہوئے قرارداد کو ویٹو کرنے سے گریز کیا۔
سلامتی کونسل کے 15 رکن ممالک میں سے 14 نے قرارداد کے حق میں ووٹ دیا جبکہ امریکہ ووٹنگ کے عمل سے غیر حاضر رہا۔ امریکہ کا قرارداد کو ویٹو نہ کرنے کا اقدام غزہ میں اسرائیل کی جارحیت پر اس کے اور اس کے اتحادی اسرائیل کے درمیان بڑھتے ہوئے اختلاف کا اشارہ ہے۔
قرارداد میں غزہ میں فوری جنگ بندی کے ساتھ ساتھ حماس کی قید میں موجود تمام اسرائیلی مغویوں کی فوری اور غیر مشروط رہائی کا بھی مطالبہ کیا گیا ہے۔ یاد رہے کہ 7 اکتوبر 2023 کو غزہ جنگ شروع ہونے کے بعد سے سلامتی کونسل کئی بار جنگ بندی کی قرارداد پر اتفاق کرنے میں ناکام رہی تھی۔
