جی ایچ ایم سی کا میگا ای۔ویسٹ کلکشن ڈرائیو۔شہریوں سے تعاون کرنے کمشنرکی اپیل

حیدرآباد: گریٹر حیدرآباد میونسپل کارپوریشن (جی ایچ ایم سی) کے کمشنر آر وی کرنن نے مشیرآباد سرکل کے باغ لنگم پلی کا دورہ کیا جہاں پر میگا ای۔ویسٹ کلکشن ڈرائیوجاری ہے۔ اس موقع پر انہوں نے ای ویسٹ کو جمع کرنے اور اس کو سائنسی بنیادوں پر تلف کرنے کیلئے انتظامات کا جائزہ لیا۔

معائنے کے دوران کمشنر نے سائٹ پر قائم کردہ ای-ویسٹ کلکشن کیمپوں اور دستیاب سہولیات کا معائنہ کیا۔ انہوں نے فیلڈ اسٹاف سے بات چیت کی اور اس مہم کے لئے مخصوص گاڑیوں اور کاؤنٹرس کی کارکردگی کے بارے میں معلومات حاصل کیں۔

ای۔ویسٹ کے ذمہ دارانہ انتظام کی اہمیت پر زور دیتے ہوئے کرنن نے شہریوں سے اپیل کی کہ وہ اپنے غیر استعمال شدہ اور پرانے الکٹرانک سامان کو مقررہ مراکز کے حوالے کر کے اس مہم میں بڑھ چڑھ کر حصہ لیں۔

انہوں نے انتباہ دیا کہ ای ویسٹ کو غلط طریقہ سے ٹھکانے لگانے سے نہ صرف ماحولیاتی آلودگی پھیلتی ہے بلکہ یہ صحت کے لئے بھی سنگین خطرات کا باعث بنتا ہے۔

انہوں نے اس اقدام کی کامیابی کے لئے عوامی تعاون کی ضرورت پر زور دیا۔ واضح رہے کہ یہ میگا ای ویسٹ کلکشن ڈرائیو جی ایچ ایم سی کی جانب سے شہر بھر میں پائیدار کچرے کے انتظام اور ماحولیاتی تحفظ کو فروغ دینے کی کوششوں کا ایک حصہ ہے۔