کتوں کے حملہ میں لڑکی کی موت

حیدرآباد: کتوں کے حملے میں ایک اور لڑکی کی موت ہوگئی۔حالیہ دنوں کے دوران تلنگانہ کے دارالحکومت حیدرآباد سمیت دیگر علاقوں میں بھی کتوں کے حملہ کے واقعات میں اضافہ درج کیاجارہا ہے۔

تفصیلات کے مطابق کریم نگر ضلع کے ماناکنڈور منڈل کے پوچم پلی میں ایک ماہ قبل ایک 13 سالہ لڑکی کو کتے نے کاٹا تھا۔ اسے قریبی اسپتال لے جایا گیا جہاں پر ابتدائی طبی امداد کے بعد اس کو بہتر علاج کے لئے حیدرآباد منتقل کیاگیاجہاں علاج کے دوران اس کی موت ہوگئی۔

ریاست کے کئی اضلاع، قصبوں اور دیہاتوں میں سڑکوں پر آوارہ کتوں کی تعداد میں حالیہ دنوں کے دوران کافی اضافہ ہوگیا ہے۔یہ کتے رات کو موٹرسائیکلوں کا پیچھا کرتے ہیں اور گاڑی سواروں کو دہشت زدہ کرتے ہیں۔

19 فروری کو حیدرآباد کے عنبرپیٹ میں کتوں کے حملے میں ایک چار سالہ لڑکا ہلاک ہوگیاتھا، اس موقع پر حکام نے کتوں کو پکڑنے کے لیے چار دن تک مہم چلائی تاہم اس کے بعد کتوں کو پکڑنے کے لئے کوئی مناسب اقدامات نہیں کئے گئے۔